Тываның Баштыңы Владислав Ховалыг суг үериниң айыылын болдурбас талазы-биле хемчеглерни чорудуп эгелэрин дааскан. Материал-техниктиг күштер курлавырын быжыглап, техника аймаан хаара тутпушаан инженер-техниктиг комплекстиг хемчеглерни дарый чорудар даалганы муниципалдыг тургузугларның удуртукчуларынга берген. Тускай мергежилдиглерниң баш бурунгаар санап турары-биле алырга, бо чылын Тывага чылыг болгаш харлыг кыш болганындан, суг үери эртежик эгелеп болур.
– Бир эвес агаарның температуразы көдүрлүп, хар дүрген эриир болза, Кызыл, Туран хоорайлар, Каа-Хем суур девискээрлерин, ол ышкаш муниципалдыг оруктарны суг ап болурунуң айыылы бар – деп, Владислав Ховалыг дыңнаткан.
Тываның Баштыңы үерни айыыл чок эртеринге белеткелдиң элээн каш айтыышкыннарын берген. Республиканың тус чер чагырга органнары муниципалдыг тургузугларның девискээринде суг-хандырылга системаларының байдалын хынап, агар септелгезин чорудары-биле саң-хөө болгаш өске-даа материал-техниктиг курлавырларны апрель 1-ге чедир тускайлаар. Марттың 1-ге чедир муниципалдыг тургузуглар элезин-даш холумактыг курлавырны тургузуп, бажың-балгаттың кырында база кудумчуларда харны аштап-арыглаарын организастаар.
ТР-ниң Арга-арыг болгаш бойдус ажыглал яамызы суг көдүрлүп кээр болза, суг ажыл-агый объектилериниң база гидротехниктиг тудугларның беленин хынаар. Албан чери хыналдаларның түңнели-биле, муниципалдыг тургузугларда херек апарган таварылгада чалдарны быжыглаар ажылды организастаар.
Владислав Ховалыг үер үезинде оперативтиг байдалды хынаарын республиканың хамааты камгалал болгаш онза байдалдар херектериниң талазы-биле албанының дааскан.
2024 чылда алды муниципалдыг тургузугларга: Кызыл хоорай, Кызыл, Бии-Хем, Чөөн-Хемчик, Чеди-Хөл болгаш Каа-Хем кожууннарда суг үериниң байдалы берге эрткен. Хамааты камгалал болгаш онза байдалдар херектериниң талазы-биле албанының болгаш республиканың өске-даа албан черлериниң деткимчези-биле эрээн сугну сордурар, сугну өскээр чаяр, арык бугаларын арыглап, ханыладыр казар ажылдар чоруттунган. Муниципалдыг болгаш регионалдыг оперативтиг албан черлериниң кады ажылдажылгазы-биле байдалды нарыыдатпайн барган.
