Республиканың Хамааты камгалал болгаш онза байдалдар херектериниң талазы-биле албанының медээзи-биле алырга, амгы үеде республикада часкы үер байдалы турум. Тывада сугга алыскан огород участоктары, чуртталга бажыңнары чок.
Эрткен неделяда элээн каш өрегелери сугга алыскан турган Тожу кожуунда байдал турум, тус чер эрге-чагыргазының чарлааны кезээде белен чоруктуң чурумун соксаткан.
Майның 13-те Сыстыг-Хем хемниң бажынга харның дүрген эрип батканының түңнелинде, сугнуң деңнели көдүрлүп, Сыстыг-Хем суурда Аэродромная биле Центральная кудумчуларда дөрт бажыңның участогун суг алганын сагындыраал. Хамааты камгалал болгаш онза байдалдар албанының тускай мергежилдиглериниң ажылчын бөлүү байдалды тодаргайлап, чурттакчы чонга дузаны чедирген. Онза байдалдар комиссиязы ол-ла черге хуралды эрттирген. Майның 14-те хемниң суу бадып, сугга алыскан турган огород участоктары хосталган. Чурттакчы чонну өскээр көжүрер хемчеглер алдынмаан.
Амгы үеде регионда май-июнь айларда болгулаар суг үериниң ийиги чадазы эртип турарын камгалакчылар демдеглээн. Тываның гидрометеорология болгаш долгандыр хүрээлел мониторинг төвүнүң дыңнатканы-биле алырга, Кызыл хоорайда Улуг-Хемде, Тоора-Хем биле Севи суурларда, Чадаана хоорайда хем суу элээн көдүрүлгени (20-ден 57 сантиметр чедир) демдеглеттинген. Өске суг объектилеринде суг деңнелиниң бадып турары эскертинип турар. Ниитизи-биле суг айыылдыг деңнелде четпээн. Чурттакчылыг суурларга айыыл чок.
Агаар-бойдус үер байдалынга чогумчалыг болган: Тывага үргүлчүлелдиг чаъстар чаар дээн баш бурунгаар медээ бадыткаттынмаан. Байдал бергедеп кээр болза дээш, регион белен турган. Тускай курлавырларны база материалдыг дериг-херекселдерни белеткээн. Ниитизи-биле 1400 оруннуг түр када чурттаар черлерни тодараткан. Суг халавының уржуктарын чайладырынга немелде күштерни белеткээн.
Муниципалдыг тургузугларның чаңгыс аай дежурный-диспетчер албанының оперативтиг дежурныйлары боттарының девискээрлеринде оперативтиг байдалды Россияның Онза байдалдар яамызының Тывада Кол эргелелиниң Кризистиг байдалдарда эргелеп-башкарылга төвүнүң неделяның селектор хуралында илеткеп турар.
«Telegram» мессенджерде тургускан тускай чатка тус чер чагыргаларында Хамааты камгалал болгаш онза байдалдар херектериниң талазы-биле албанының Хамааты камгалал болгаш онза байдалдар херектериниң талазы-биле албанының тускай мергежилдиглери метеорологтуг болгаш гидрологтуг байдалды, гидротехниктиг тудугларның байдалының дугайында неделя санында дыңнадып турар. Бир эвес республика девискээринге агаар-бойдус баксыраар деп барза, смс-дыңнадыгларны тарадып эгелээр.
