2024 чылдың эгезинден тура хоойлуга чөрүштүр садыглаашкындан хавырган арага аймааның саны эң хөй болган. Ажыл-чорудулганың чамдык хевирлеринге чөпшээрел бээр регионалдыг албанның дыңнатканы-биле алырга, декабрь эгезинде 48 муң ажыг литр ындыг араганы илредип, туткан (2023 чылда – 32 муң). «Ак», «Шивилиг», «Таңды», «Самагалдай», «Сарыг-Сеп» орук-хайгыыл албанының доскуулдарынга автотранспорт хыналдаларның үезинде ооң хөй кезиин туткан.
Полиция болгаш корум-чурум камгалаар өске-даа черлер-биле хайгаарал органнарының кады чоруткан тускай операциялар үезинде ол-ла хире хемчээлдиг шынар чок араганы илереткен. Чыл дургузунда ындыг рейдилер араганы хоойлуга удур саткан 248 таварылганы туткан. Хоойлуга чөрүштүр арага садыглаашкынынга хамаарышкан кем-херек үүлгедиишкиннериниң саны-биле Кызыл хоорай, Улуг-Хем, Бии-Хем база Таңды кожууннар болган.
Рейд киржикчилериниң чугаазы-биле алырга, садыгжылар мессенджерлер болгаш социал четкилер дамчыштыр чагыгларны идепкейлиг хүлээп эгелээнинден, хоойлуга удур арага садар чорук-биле демисежири улам бергедеп турар. Ынчалза-даа эрге-чагырга ындыг хевирниң контрабандазы-биле база ажылдап эгелээн. Бүгү кем-херек үүлгедиишкиннериниң 42 хуузу республиканың найысылалында болуп турары таварылга эвес, хоойлуга удур ындыг «курьер» чедирилгези хоорайда сайзыраан.
Эрге-чагырга органнары хоойлу үрекчилерин кезедир дээш оон-даа шиитпирлиг хемчеглерни ап эгелээн. Хоойлуга дүүшпес арага садыгжыларынга хамаарыштыр чүгле административтиг эвес, а судка четкен кеземче херектерин оттурары көвүдээн. 2024 чылда хоойлуга удур арага сатканы дээш 29 сайгарлыкчы улуг торгаалдарга онаашкан.
Тываның эрге-чагыргазы арага продукциязын хоойлуга удур садып-сайгарары-биле демиселди улам күштелдирер сорулгалыг. Ол талазы-биле илереттинген хоойлу хажыдыышкыннарының болгаш оларны чайладырының талазы-биле алдынган хемчеглерниң отчедун неделя санында республика Баштыңы Владислав Ховалыгже киирип турар.
Кем-херек үүлгедиишкиннериниң көвүдээни-биле ол айтырыгже кичээнгейни улгаттырган – Иштики херектер яамызының сан-чурагайы-биле алырга, үш кем-херек үүлгедиишкининиң бирээзи-ле эзирик байдалда кылдынып турар. Хоойлу езугаар, ол аар кем-херек үүлгедиишкининге санадыр.
Эрткен чылга деңнээрге 2024 чылда Тывада оларның саны 13 хуу эвээжээн, ол база «кара» арага рыногу-биле демиселдиң түңнели-дир.
