Тывада Донецк Улус Республикадан делегация келген

Дайынчы хөделиишкиннер девискээринден Тывада келген баштайгы аалчылар – Донецкиде «Россияның тускай шериг операцияларының болгаш Афганистанның хоочуннар эвилели» хөй-ниити организациязының даргазының оралакчызы, тускай шериг операциязының киржикчизи, Донецк Улус Республиканың ополченнер хоочуну Андрей Ковалев, «Ретро-гараж» автономнуг коммерциялыг эвес организацияның директору Валентин Ермаков, «Сейчас» хөгжүм бөлүүнүң лидери Александр Чурса.

Андрей Ковалев 55-ки гвардейжи тускай мото-адыгжы (даг) бригаданың дайынчыларынга Авдеевка хоорайны хостаарынга киришкени дээш четтиргенин илереткен.

– Тывада бир дугаар келгенивис бо. Каш хонук дургузунда дуржулга солчуп, аныяктар-биле ужуражылгаларны эрттирер бис.
Донецк Улус Республикада мурнуку одуругда тулчуп турар Тывадан дайынчыларның маадырлыг чоруун, дайынчы соруун, Ада-чуртунга болгаш төрээн черинге ынакшылын, езулуг-ла патриотчу чоруун демдеглекседим. Бо бүгүнү олардан өөренир бис.
Бис дайынчы хөделиишкиннер девискээринде 10 чыл ажыг чоруп турар болгаш тыва дайынчылар-биле арга-дуржулгавыс үлежип турар бис. Чижээлээрге, «кушкаштарны» хайгыылга ажыглаары.
Донецкиде тускай шериг операциязының киржикчилериниң реабилитация база ресоциализациязын болгаш аныяк-өскен аразынга ада-чурту кижизидилге ажылдарын чорудуп турар бис.
Агаар-бойдус чеже-даа соок болза, хүндүлээчел тыва чоннуң хүлүмзүрүү бисти чылыдып тур – деп, ол чугаалаан.

Авдеевкадан Валентин Ермаков тускай шериг операциязының киржикчизи Ачыты Нурзатты деткип, ачы-дуза концертинге киржир дээш келгенин дыңнаткан. Ол тыва эки турачыларның салгалы – өгбелериниң маадырлыг чоруун уламчылап турарын онзалап демдеглээн.

Александр Чурса бичиизинден тура Тывага келиксээн күзелин боттандырганын дыңнадып, Россияда сарыг шажынның эң улуг өргээзи болур «Тубтен Шедруб Линг» хүрээге чедер күзелин илереткен.

Ачыты Нурзат «Төрээн Тывам эзирлери» деп тускай шериг операциязының киржикчилеринге болгаш оларның өг-бүлелеринге тураскааткан ачы-дуза концерти февраль 21-де Улусчу чогаадылга бажыңынга 16.00 биле 19.00 шакта болурун дыңнаткан.