Декабрь 16-дан 20-ге чедир Тывада «Муниципалдыг тургузугнуң эң эки чаңгыс аай дежурный диспетчер албаны-2024» ат дээш регион чергелиг мөөрей болуп эртип турар.
Чылдың-на эртип турар бо мөөрей муниципалдыг чаңгыс аай дежурный диспетчер албанының ажылын экижидеринге, оларның кайы хире үре-түңнелдиг ажылдап турарын үнелээринге, ажылдың чаа аргаларын кииреринге дузалаар.
Тываның Хамааты камгалал болгаш онза байдалдар херектериниң талазы-биле албанындан, Россияның Онза байдалдар яамызының Тывада Кол эргелелинден база регионнуң өске-даа яамылар болгаш албан черлеринден тускай мергежилдиглер мөөрей комиссиязынче кирип турар. Комиссия кежигүннери муниципалдыг тургузугларның берген документилерин өөренип көргеш, доктааткан үнелел барымдаалар езугаар чаңгыс аай дежурный диспетчер албанының ажыл-чорудулгазын үнелээр.
Албан чериниң шупту негелделерге дүгжүп турарын, берген медээлерниң долузун болгаш шынарын, ол ышкаш отчеттуг үениң дургузунда чаңгыс аай дежурный диспетчер албанының ажылының түңнелдерин барымдаалап салган баллдар-биле тиилекчилерни тодарадыр.
Чаңгыс аай дежурный диспетчер албанының амгы үениң техниктиг чепсектери-биле дерээнин, видеоконференция системазының ажылын, профессионал кадрлар-биле четчелеттингенин, диспетчер кижиниң тургустунган байдалдарга шын хөделиринге белеткелин болгаш арга-шинээниң деңнелин, Россияның Онза байдалдар яамызының кризистиг байдалдарда башкарылга төвү болгаш өске-даа дүрген хөделир төптер-биле медээ солчулгазын организастаанының шынарын дээш, оон-даа өске чүүлдерни кичээнгейге алыр.
Тыва Республиканың онза байдалдарны болдурбас база оларны чайладырының талазы-биле чаңгыс аай күрүне системазының иштинде девискээр системазының 2024 чылда ажылдаанының түңнелдери-биле тиилекчилерни шаңнаар.
