2025 чылдың декабрь 31-ден 2026 чылдың январь 11-ге чедир республикада 33 чуртталга бажыңынга өрттер бүрүткеттинген. Россияның Онза байдалдар яамызының Тывада Кол эргелелиниң дыңнатканы болза, өрттер үезинде ийи кижи чок болган, чеди кижи когарап, угарлыг газтан хораннанган.
Тываның Баштыңы Владислав Ховалыг муниципалдыг районнар болгаш хоорай чагыргаларынга ооң мурнунда хажыдыышкыннар бүрүткеттинген хөй аалдыг бажыңнарны пландан дашкаар өртке удур хынаарын организастаарын база чурттакчы чон ортузунга өртке удур айыыл чок чоруктуң профилактиказын күштелдирерин дааскан.
Россияның Онза байдалдар яамызының Тывада Кол эргелелиниң начальниги Алексей Артемов чоокта чаа болган өрттер дугайында илеткеп тура, январь 10-да Кызыл хоорайның Убсу-Нурская кудумчузунда хөй аалдыг 6 дугаарлыг бажыңга болган өрттү аңгы айыткан. Өрттү өжүргениниң түңнелинде, ол бажыңның подъездизинден 37 кижини, ооң иштинде 14 чашты өскээр көжүрген, ол кижилерниң аразындан угарлыг газтан хораннанганын шинчиири-биле беш кижини эмнелгеде чыттырган.
2025 чылдың декабрь 31-де база январьның 2, 3-те Бай-Тайга, Чөөн-Хемчик, Таңды кожууннарга база Кызыл хоорайга угарлыг газтан хораннанган таварылгалар демдеглеттинген, оларның аразында назы четпээннер база бар. Баш бурунгаар медээлерден алырга, печканы шын эвес ажыглаанындан өрт айыылының дүрүмнери хажыттынып, онзал-ондактың үнеринге чылдагаан болган.
Ооң-биле чергелештир, хөй аалдыг эрги бажыңнарның өртке удур айыыл чок байдалын хынаан соонда, оларның дыка хөйүнде хажыдыышкыннар илереттинген. Тываның Баштыңы муниципалдыг тургузуглар чагыргаларынга социал камгалалы кошкак кижилерниң, оларның аразында чааскаан чурттап турар хоочуннарның, хөй ажы-төлдүг өг-бүлелерниң болгаш өскелерниң-даа бажыңнарынга өрт медээчилерин салыр даалганы берген.
Ол ышкаш Тываның Күш-ажыл болгаш социал политика яамызы чединмес болгаш амыдыралдың берге байдалынга таварышкан өг-бүлелерге өрт медээчилерин салыр программазын уламчылаар. 2018 чылдан эгелеп республикада печка одаар бажыңнарлыг хөй ажы-төлдүг база эвээш хандырылгалыг өг-бүлелерге, инвалид кижилерге 3000 ажыг автономнуг өрт медээчизин салган.
Оон аңгыда, регионнуң удуртукчузу чон ортузунга өртке удур айыыл чок чорукка хамаарыштыр тайылбыр ажылын күштелдирерин, өг-бүле кежигүннериниң кадыкшылын болгаш айыыл чок чоруун камгалаар дээш, хөй аалдыг бажыңнарга өртке удур медээчилерни тургузары чугула дээрзин айыткан.
Чазак даргазының оралакчылары өртке удур хемчеглерниң күүселдезин хыналдага алыр.
