Эрткен неделяда чурттакчы чон "Хөмүр-даш продукциязы" күрүнениң информация системазының ажылынга хамаарыштыр хомудалдарны киирген – хөмүр садып алырынга чугула херек QR-кодту бүрүткедип база алыр дээрге, система ажылдавайн турарын дыңнаткан.
ТР-ниң Одалга болгаш энергетика яамызы чурттакчы чонга таарымчалыг кылдыр системаны чаартып турганындан, түр үеде ынаар киртинмейн турганын тайылбырлаан. Ам QR-кодту боттары бүрүткедип, ону алыры, чүгле каш минутаның ажылы апарган.
Чондан айтырыгларның көвей кезии эрткен чылгы QR-коду-биле хөмүр садып ап болур бе, ону чидирип алган, азы оозу чок болза канчаарыл деп айтырыглар келген. "Хөмүр-даш продукциязы" КИС-ти чаарткан соонда, эрткен чылдың кюар-кодтары база чаартынган, ынчангаш бүрүткелдиг хамаатылар чаа кодун алыр дизе, системаже кирерин яамы тайылбырлаан.
«Хөмүр-даш продукциязы» күрүнениң информация системазынга боттары канчаар бүрүткедирил база QR-кодту алыры
Системага бүрүткетпээн кижилер https://cpgu.rtyva.ru айтыгже киргеш, ону кылдырып ап болур. Айтыгже кире бергеш, тайылбыр езугаар операцияны кылыр, ол-ла. Бир эвес бергедежип турар болзуңарза, Чаңгыс аай тайылбыр албанының 8(39422)5-15-49 дугаарлыг телефонунче долгаар. Системага бүрүткеткеш, хуу кабинединге бажыңын айтып немээн соонда, бодунуң адрезинче баскаш, QR-кодун алыр. Тодаргай бажыңның шөлүнге санаан херек тонназын айыткан кодту алыр. Бо-ла айтыгдан чаартынган QR-кодту катап база хуу кабинет таварыштыр ап болур.
Системага бүрүткедири база QR-кодту алыры
Бир эвес системага боттары бүрүткедип азы QR-кодун киирип шыдавас болза, чурттап турар чериниң аайы-биле, муниципалитеттиң чагыргазында хөй хүлээлгелиг төптерден, ол ышкаш Тываның Одалга болгаш энергетика яамызының дараазында дугаарлыг телефоннарындан 8(39422)5-16-86, 8(39422)5-15-49 дузаны дилеп болур.
QR-код чокка хөмүрнү садып алыры
"Хөмүр-даш продукциязы" күрүнениң информация системазында ооң мурнунда бүрүткеткен хамаатылар QR-код чокка, паспортун база СНИЛС-ин көргүскеш, Каа-Хем азы Чадаана хөмүр уургайларында күрүнениң болгаш хуу оттулар чүүл шыгжамырында хөмүрнү садып ап болурун Тываның Одалга болгаш энергетика яамызы сагындырган.
«Хөмүр-даш продукциязы» КИС ажыглакчылары хөмүрнү кайыын садып алырыл
Бөгүнде "Хөмүр-даш продукциязы" күрүнениң информация системазында республиканың 64 муң хире өрегези бүрүткеткен, 44, 5 муң ажыг тонна хөмүрнү садып алган. Тываның 16 кожуунунда ажыглалда деңзилерлиг 36 оттулар чүүл шыгжамыры ажылдап турар. Тыва Республиканың Чазааның 2023 чылдың декабрь 29-та N970 доктаалы-биле бадылааны өртек-үнелиг хөмүрнү Каа-Хем уургайының чанында чүгле чаңгыс күрүне шыгжамыры садып турар, чон дыка дүрген садып апаарындан бөгүн ында одаар чүүл чок.
Амгы үеде хуу сайгарлыкчылар 23 оттулар чүүл шыгжамырын хандырып турар, «ТСП» КУБ-та 13 күрүне шыгжамыры бар. Чурттакчы чон хуу оттулар чүүл шыгжамырында одаар чүүлдүң чогун дараазында дугаарларже дыңнадып болур - 8(39422)5-15-49, 8(39422)5-16-86, а күрүне шыгжамырында байдалды 8(39422) 2-03-53 дугаар хүлээп ап турар.
Оттулар чүүл шыгжамырында хөмүр-даштың өртек-үнези
"Хөмүр-даш продукциязы" күрүнениң информация системазындан Тываның шупту хоорайларында болгаш кожууннарында хөмүрнүң өртек-үнезин көөр дизе, https://cpgu.rtyva.ru сайтыда интерактивтиг картада муниципалитеттиң ылгавыр демдээнче базар. Картада шыгжамырның азы уургайның адын, ооң адрезин, ажылының графигин, бар хөмүрнүң марказын база тоннада өртээн, шыгжамырда чеже тонна одаар чүүл барын айтып каан болур.
Каа-Хем биле Чадаана хөмүр уургайларында чурттакчы чонга бир тонна хөмүрнүң өртээ QR-код-биле 2765 рубль, а шыгжамырлар хөмүр бүдүрүлгезинден чурттакчылыг черниң ыраан көрүп, хөмүр сөөртүп-чедиргениниң чарыгдалын кадып, өртекти немеп алырлар. Чижээ, Каа-Хем суурнуң Мелиораторлар кудумчузунда хуу сайгарлыкчы А.С. Монгуштуң оттулар чүүл шыгжамырында бир тонна хөмүрнүң өртээ – 3155 рубль.
