Тывада хоойлуга чөрүштүр ыяш кезери-биле демиселди күштелдиргени, үре-түңнелдерни берген

Күрүнениң арга-арыг инспекторлары 2024 чылда арга-арыг хоойлужудулгазының үрээшкиннерин болдурбазы-биле 2794 хыналда-хайгаарал ажылдарын чоруткан.

Чаңгыс аайлаан ажылдың ачызында арга-арыг шөлдеринден ыяшты хоойлуга удур кескен 56 таварылганы илередип, соксаткан. Хоойлуга удур кескен ыяштарның ниити хемчээли 408,2 куб метр. Тываның арга-арыг фондузунга 4,3 сая ажыг рубль когаралды чедирген.

Хыналдаларның түңнелинде РФ-тиң административтиг чурум үрээшкиннериниң дугайында хоойлунуң 8.28 чүүлү-биле хоойлуга удур ыяш кескени дээш 45 административтиг херекти оттурган. Ниитизи-биле 135,0 сая рубльге административтиг торгаалдарны онааган.

Оон аңгыда, Россия Федерациязының Кеземче хоойлузунуң 260 чүүлүнде көрдүнген харыысалгага онаажыр хоойлуга удур ыяш кезериниң дугайында 11 билдириишкинни Россияның Иштики херектер яамызының Тывада девискээр органнарынче чоруткан. Он таварылгада кеземче херээн оттурган, оларның дөртү билдинмес кижилерге, а алдызы тодаргай хамаатыларга хамааржыр. Хоойлуга удур кескени дээш оттурган11 кеземче херээнге коштунган кескен ыяштың ниити хемчээли 181,5 куб метр, когаралы – 2,3 сая рубль.

Хоойлуга чөрүштүр ыяш кезеринге удур демисежир албан черлер аразының ажылчын бөлүүнүң ажылы көскү түңнелдерни берген: эрткен чылдың бо үезинге деңнээрге, республикада хоойлуга удур кескен ыяштың хемчээли 333,4 куб метрге кызырылган (азы 45 хууга), арга-арыг фондузунга чедирген когарал 860,2 муң рубльге (азы 16 хууга) эвээжээн.