Тываның Чазааның кежигүннери «Күзелдер Шивизи» бүгү-российжи ачы-буян акциязынга каттышкан. Чазак бажыңында тургускан Чаа чылдың шизинден уругларның күзелдерин бижээн саазын «ойнаарактарны» шилип дүжүрген.
“Баштайгыларның шимчээшкини” уруглар болгаш аныяктарның бүгү-российжи шимчээшкининиң региондыг салбырының идепкейжилери акцияны эрттиреринге дузалашкан.
Бо чылын Тываның эрге-чагырга органнарының удуртукчулары, күрүне албан хаакчылары, депутаттар, сайгарлакчылар Чаа чылдың илбичилери болуп, чүгле бистиң уругларывыстың эвес, а Луганск Улус Республикадан дөрт уругнуң күзелдерин боттандырар.
Тываның Баштыңының Администрациязы база Чазак Аппарадының удуртукчузу Юрий Ананьин шивиден «ойнааракты» бир дугаарында дүжүрген. Кызылдан чеди харлыг Дианага Чаа чыл бүдүүзүнде сөңнээр хуулгаазын белекти ол боданып, чогаадыр.
ТР-ниң Чазак Даргазының социал политика талазы-биле оралакчызы Орлан Сарыглар Бай-Тайга кожууннуң Бай-Тал суурдан 10 харлыг Лилянаның гитаралыг болуксаан, а Свердловск хоорайдан 11 харлыг Соняның боду кылаштаар ойнаар-кыс күзээн күзелдерин боттандырар.
ТР-ниң Чазак Даргазының оралакчызы Айдын Чюдюк Чөөн-Хемчиктиң Шеми суурдан үш харлыг Даниланың тывызыксыг белээн, Свердловсктан сес харлыг Алешаның чадаг-терге күзээн күзелин күүседир.
Оралакчы дарга Виталий Бартына-Сады Шемиден 13 харлыг Сайзананың адар ча, согунун, Свердловсктан 14 харлыг Ольганың чадаг-тергезин Чаа чыл бүдүүзүнде боттандырар.
Кызылдан дөрт харлыг Дариманың эптээр бассейнин ТР-ниң Чазак Даргазының оралакчызы Алик Монгуш, Ак-Довурактан чеди харлыг Аринаның синтезаторун оралакчы дарга Олег Лукин күүседирлер.
Тываның Баштыңы Владислав Ховалыг бүгү-российжи ачы-буян акциязының республикага стартын декабрьның 21-де бергенин сагындыраал.
Кызылдың бичии чурттакчызы Ангелина бодап алган белээн кымны мурнай алган. Ол төрүмелинден дыңнавас. Чурукчу болур күзелдиг кыстың авазы уруун Надя Рушева аттыг уран чүүл школазынче бижиттирер планныг. Күш-ажыл болгаш социал политика сайыды Эдуард Сандан Ангелинага Соок-Ирей болуп аалдап четкен. Ол бичии чурукчунуң хөгжүлде сайзыралынга ажыктыг апаар планшетти сөңнээн.
Республиканың күрүне садыглаашкынының яамызы база саң-хөө-бюджет хайгаараар албан чериниң Соок-Ирейлери элээн каш чаштарның күзедерин хандырган.
Бүгү-российжи акцияның регионалдыг координатору бо чылын Тывадан 123 уругнуң күзелин боттандырарын дыңнаткан.
Президент Владимир Путинниң эгелээшкини-биле, Чаа чыл бүдүүзүнде эвээш хандырылгалыг болгаш кадыкшылы кызыгаарлыг уругларга өөрүшкүнү сөңнээн «Күзелдер Шивизи» акция чуртта беш дугаар чыл эртип турарын сагындыраал. Акцияга киржир дизе, ёлкажеланий.рф албан езунуң сайтызынче чагыгны киирер.
