Тываның эрге-чагыргазы инвалид улуска чедингир хүрээлеңни тургузарынче база бир базымны кылган: республикада социал инфратургузуг болгаш эргежок чугула ачы-дузаларже шаптараазын чок кирерин хайгаараар системаны ажылдадып эгелээн.
Комиссия объекти бүрүзүнге хыналданы чорудуп, мониторингини кылыр. Хынаар ужурлуг объектилер санынче кадык камгалал, өөредилге, спорт, дыштанылга болгаш садыг-сайгарылга черлери, ол ышкаш социал албан болгаш социал хандырылга организациялары, чуртталга-коммунал айтырыгларын харыылаар албан черлери кирген. Оон аңгыда, транспорт инфратургузуу, ооң иштинде вокзалдар, аэропорттар болгаш өске-даа логистика белдирлери кирип турар.
Комиссияның сорулгазы – кирер эжиин, иштики шимчээшкинин, тускай девискээрлерни, арыгланыр өрээлдерин канчаар кылганын комплекстиг хынап, информацияның чедингирин көөр. Үнүүшкүннүг хыналдаларның түңнелинде, амгы байдалды бадыткап, адаптация хемчеглерин айыткан документини тургузар. Кадыкшылының байдалы-биле харык-шинээ кызыгаарлыг улустуң хөй-ниити организацияларының төлээлериниң чөпшээрели-биле оларны комиссияже киирер.
Мониторингиниң кол сорулгазы – хүрээлелдиң амгы байдалын демдеглеп алырындан аңгыда, четпестерни эдип алыр кылдыр, ону чайладыр хуусааларны айтып, удуртулга шиитпирлерин хүлээр кылдыр илереттинген шаптараазыннарның тодаргай сайгарылгазын белеткээш, тус чер чагыргаларынче киирер.
Система доктаамал ажылдаар: хемчеглерни боттандырган соонда, шаптараазыннарны чайлатканын хынап, катап база хыналдаларны чорудар. Инвалид улустуң боттарындан удур харылзаа база херек: оларның санал-оналдары херек кырында таваржып турар бергелерин билип алырынга дузалаар. Херек болза, шаптараазын чок шимчээшкинни хандырар планнарже өскерилгелерни болгаш немелделерни киирип болур.
Кадыкшылының байдалы-биле харык-шинээ кызыгаарлыг улустуң ажыглалында объектилерниң чедингирин хайгаараар хыналданы чылда эвээш дизе чаңгыс катап чорудар. Ол ажылды дүүштүрүп хынаарын Тываның Күш-ажыл болгаш социал политика яамызынга онааган. Яамы инвалид улуска болгаш өске-даа шимчээшкини кызыгаарлыг бөлүктүң кижилеринге объектилерниң болгаш ачы-дузаларның чедингиринге хамаарышкан улуг илеткелди чылдың-на ниитилелге таныштырар хүлээлгелиг.
