Тывада кем-херектер саны кызырлып турар

2024 чылдың тос айларында Тывада бүрүткеттинген кем-херектерниң саны доктаамал кызырлып турары демдеглеттингенин Тываның Чазак Даргазының оралакчызының хүлээлгезин күүседип турар Айдыс Сынаа аппарат хуралында илеткээн.

ТР-ниң Иштики херектер яамызының сан-чурагайындан алырга, эрткен чылдың ол үезинге деңнээрге, бо чылдың октябрьда кем-херектер саны 4642 турганындан 7 хуу кызырлып, 4312 болган. Өлүрүүшкүн (30,7 хуу), дээрбедекчи халдаашкын (35,7 хуу) дээн ышкаш, кем-херектер саны эвээжээнин оралакчы дарга дыңнаткан.

Оон аңгыда, оорлаашкын 20,7 хуу, күштээшкиннер база наркотиктер-биле холбаалыг кем-херектер 18 хуу кызырылган. Оон аңгыда кудумчуга болгаш хөй-ниити черлеринге бүрүткеттинген корум-чурум үрээшкиннери 20 хуу, “эзирик” кем-херектер 13,8 хуу, назы четпээннерниң хоойлу үрээн хөделиишкиннер 13,6 хуу эвээжээн.

Ооң мурнунда шииттирип чораан кижилерниң дагын катап кем-херек үүлгедиишкини 16 хуу, ок-боолуг кем-херек үүлгедиишкини тос хуу, онза болгаш онза аар кем-херектер саны ийи хуу кызырылган.

Эрзин кожуунда кем-херек үүлгедиишкиннери ийи катап эвээжеп, эки талаже өскерилген. Кем-херектер статистиказы Чеди-Хөл база Тере-Хөл кожууннарда 30 хуу, Чаа-Хөл биле Чөөн-Хемчикте 11,8 хуу кызырылган. Каа-Хем, Улуг-Хем кожууннарда, Кызыл хоорайда база Өвүр, Кызыл, Сүт-Хөл болгаш Бии-Хем кожууннарда криминогенниг байдал экижээни демдеглеттинген.

Оралакчы дарганың бодалы-биле алырга, демдеглеттинген турум эки үре-түңнелдер республика чазааның корум-чурум камгалаар органнар база профилактика субъектилери-биле тускай угланыышкынныг ажылының түңнели-дир.

Ындыг болзажок эрткен айның түңнели-биле чамдык көргүзүглерде өзүлде демдеглеттингенин Айдыс Сынаа демдеглээн. Ок-боо-биле холбаалыг, ол ышкаш информастыг-телекоммуникация технологияларын ажыглаан кем-херектерниң саны өскен.

Статистиктиг сан-чурагайларлыг болгаш сайгарылгалыг тодаргай информацияны республиканың шупту кожууннарынче тараткан. Эки үре-түңнелдерни арттырып, оон-даа экижидери-биле профилактика ажылдарын улаштыр чорудар хемчеглерниң тодаргай планын ажылдап кылыр даалганы муниципалдыг тургузугларның удуртулгазынга берген.