Тываның кадрлар төвүнүң ажылдакчылары бо чылдың сес айында хоругдал черинге кеземче эрттирген соонда хосталып үнүп келгенбилдириишкин киирген кижилерниң үш кезиин, азы 32 кижини ажылче киирген. Эрткен чылын шак ол бөлүкке хамааржыр 37 кижини ажылга тургускан. Россияның кеземче күүселдезиниң Тывада эргелели-биле хосталырынга белеткенип турар хамаатыларны деткиир реабилитация системаның кады ажылдажылгазының бир кезии ол.
Россияның кеземче күүселдезиниң Тывада эргелели-биле кеземче херээ эртип турар кижилерниң социал-экономиктиг ижигиишкин программазын боттандырар ажыл-биле албанның тускай мергежилдиглери хосталып үнер деп турар кижилерге 42 деткимче программазын ажылдап кылган. Эдип-чазаар албан черлеринге 14 үнүүшкүннүг ужуражылга-консультацияны болгаш ажылчын олуттар ярмаркаларын организастаан. Оон аңгыда, кадрлар төвү хоругдал черлеринден хосталып үнүп келген кижилерге социал керээге үндезилээн күрүне деткимчезин алырынга методиктиг деткимчени болгаш үделгени көргүскен.
Чонну ажылга хаара тудар төптүң ажылдакчылары он кижиге бизнес-планнар тургузарынга дузалаан, олар ону чедиишкинниг камгалааш, боттарының херээн ажыткан. Бир киржикчини өөредип чоруткан – ол ам кондитер мергежилин шиңгээдип турар.
«Хосталгаже үне берген кижилерге коргуушкун болгаш бодунга бүзүревес чорукту ажып эртери дыка берге. Кажанда-даа ону эрте бээр аргалар бар деп көргүзери – бистиң сорулгавыс. Бир эвес эртем-билии чок болза, халас өөредип, ажыл берикчизин тып берип, бизнес ажыдар идеязы бар болза, ону ажылдап кылырынга дузалажыр бис. Ол кижиде амыдыралын өскертир күзелдиң бары эң чугула, ынчан бис оларны деткип, орукту кады эртер бис» – деп, Тываның кадрлар төвүнүң килдис даргазы Алдынай Сержи чугаалаан.
Бо чылдың сес айларында шииттирип чораан 81 кижи, оларның 16 хуузу херээжен улус Тываның кадрлар төвүнден ажыл тыпчып бээр дузаны дилээн. Билдириишкин киирген улустуң хөй кезии тускай эртем-билии чок-даа болза, хоойлу езугаар ажылга тургустунарынга база социал ижигиишкин эртеринге белен болганы эң кол деп, тускай мергежилдиглер демдеглээн.
