Тываның Чазаа кожуун азы хоорай чагырга даргаларынга дааскан девискээрде, хөй-ниити корум-чурумун болгаш хоойлу-дүрүм сагылгазын быжыглаарынга улуг харыысалгалыг эң эки оралакчызы ат дээш мөөрейни тургускан.
Тываның Баштыңы Владислав Ховалыг бодунуң блогунда ооң дугайында хүлээп алганы шиитпирин дыңнаткан. «Мөөрейниң сорулгазы – корум-чурум үрээшкиннерин болдурбаан болгаш көскү түңнелдерни чедип алган эки ажылдыг оралакчыларны илередири болур» – деп, чаа эгелээшкинниң кол утказын тайылбырлаан.
Республика чурттакчыларының болгаш аалчыларының айыыл чок чоруун хандырарынга оларның идепкейинден болгаш арга-мергежилинден хөй-ле чүүлдер хамааржыр дээрзинге республика баштыңы бүзүрелдиг. Мөөрей корум-чурум үрээшкиннериниң санын эвээжедири-биле ажылга чаа идеяларны болгаш аргаларны илередиринче, профилактика хемчеглеринче чурттакчыларны хаара тударынче база чурттакчылыг черлерге тайбың, таарымчалыг байдалды тургузарынче угланган.
Мөөрейниң негелдези-биле чылдың-на чагырга даргаларының болгаш хоорайлар мэрлериниң үш шыырак оралакчыларын тодарадыр. Ынчангаш сес негелдени тургускан – хөй-ниити черлеринге кем-херек үүлгедиишкиннери, өлүрүкчү болгаш кадыкшылга аар кемдээшкин чедирген херектер, орук озал-ондактары, ооң иштинде эзирик чолаачыларның хайындан айыыл-халаптар, эзирик тургаш кылган кем-херек үүлгедиишкиннериниң бүрүткеттинген санын эвээжеткени.
Оон аңгыда, мөөрейниң киржикчилеринге демдек салырда, муниципалитеттиң административтиг комиссиязының ажылын, корум-чурум үүлгедикчилерин илередир болгаш административтиг харыысалгага онаар талазы-биле чагырга ажылдакчыларының идепкейин, ол ышкаш эки турачы хөй-ниити дружиналарының ажыл-чорудулгазын организастаанын кичээнгейге алыр.
Владислав Ховалыг чаа мөөрейни эрттирер талазы-биле ажылды республика чазаанда айыыл чок чорук болгаш корум-чурум айтырыгларын удуртуп турар оралакчызы Айдыс Сынаага дааскан. Мөөрейниң түңнелдерин үндүрер комиссияның удуртукчузу кылдыр ону томуйлаан.
