Тываның Баштыңы Владислав Ховалыгның эгелээшкиннери болгаш федералдыг төптүң деткимчези-биле сөөлгү үш чылда Тываның тудуг адыры шапкын хөгжээн. ТР-ниң Чазак Даргазының оралакчызы Олег Лукин 2024 чылдың баш бурунгаар түңнелдери тудуг ажыл-чорудулгазы шапкын хөгжүлдени көргүскенин онзалап демдеглээн.
Республика 13 национал төлевилелдерде киржип, оларның күүселдези-биле 290 объектиде ажылдарны чорудуп турар. Амгы үеде оларның 205-зинде ажылдарны – чаа объектилерни тудуп, үндезин септелгелерни дооскан.
Каа-Хем суурда 10 ажыг чыл бурунгаар эгелээн спорт-культура төвүнүң тудуун доозары – кол төлевилелдерниң бирээзи деп, оралакчы дарга демдеглээн. ТР-ниң Спорт яамызы узамдыккан тудугну «Демография» национал төлевилелдиң объектилер даңзызынче киирер дугуржулганы чедип алганындан, төлевилел шиитпирлеринге чогуур өскерилгелерни киирип, немелде акшаландырыышкынны хаара тудар аргалыг болган.
– Амгы үеде мында шеверлел ажылдары чоруп турар, төптү чазын ажыдары планнаттынган. Спортчу болгаш культурлуг хемчеглер эрттирер чаа социал шөл ол апаар – деп, Олег Лукин демдеглээн.
Оон аңгыда Чазак Даргазының оралакчызы кожууннарда тудугларже, фельдшер-акушер пунктар болгаш школалар тудуунуң хөгжүлдезинче кичээнгейни угландырган. Бо чылын көдээ суурларда дөрт школаны үндезини-биле септээн.
Шалыпкын темпилиг тудуг ажылдары тудуг материалдарынга хереглелди өстүрген. Республикада тууйбу, демир-бетондан база үүрмектээн резинден кылыглар бүдүрүлгези эгелээн. Чаа ажылчын олуттар тургустунуп, үндүрүг орулгалары көвүдеп, шалыңнар өскен.
– Тывада тудугнуң хөгжүлдези республиканың социал инфратургузуун болгаш чурттакчыларның амыдырал-чуртталга байдалын экижидер. Ындыг арга-биле келир үеде көскү чедиишкиннерни чедип алыр аргалыг бис – деп, Олег Лукин түңнээн.
