Чоннуң байырлалы Шагаага белеткенириниң болгаш эрттирериниң талазы-биле республиканың оргкомитет хуралын ТР-ниң Чазак Даргазының оралакчызы Уран-оол Ондар удуртуп эрттирген.
Дөгээ даанга, Кадарчы тураскаалынга, Тыва Республиканың культура болгаш дыштанылганың национал парыгынга «Саң салыр» езулалдарны организастаар кол ажылчын бөлүктерни хурал үезинде тургускан. Ол ышкаш Арат шөлүнге театржыткан оюн-көргүзүгнү белеткеп, эрттирер аңгы бөлүк тодараттынган.
Бо чылын Ай санаашкыны-биле февраль 18-те Шагаа хүнү үнер. Байырлалдың онзагай чүүлү – дүн ортузунда эвес, караңгының орнунга чырыткылыг чаа амыдырал катап төрүттүнер деп бурунгу бүзүрелди илередип турар даң хаяазында ол эгелээр.
Шагааның оргкомитеди хемчеглер чүгле хөйнүң-чарның хөглээшкининче эвес, а республиканың шупту чурттакчыларын болгаш аалчыларын байырлалдың эң-не эки чаңчылдары-биле таныштырарынче кичээнгейни угландырар ужурлуг дээрзин онзалап демдеглээн.
Эртип турар чылдың сөөлгү айында Чаа чылга аңгы белеткенир. Улус байырлалга сагыш-сеткил арыгланыышкыны-биле чергелештир, узун кыштың соонда бажың-балгадын аштап-арыглааш, Шагаага белеткээн үүжезин бузуп, идик-хевин даарап, чаартып белеткенир. Ай дургузунда өг-бүледе улуг кижилер байырлалга белеткенип, уткуп тургаш сагыыр ужурлуг езу-чаңчылдарны болгаш езулалдарны аныяк-өскенге угаадып таныштырар.
