Ужудукчу чок ужар чүүлдер, чылыг «көөр» камералар, төтчеглекчилерге удур комплекстерни ажыглалче кииргени Тываның Аңныыр болгаш бойдус камгалал хайгааралының күрүне комитединиң кол көргүзүглеринде эки түңнелдерни берген.
2021 чылга деңнээрге 29 хуу хөй, азы 128 баш кокайны узуткаан. Рейдилиг үнүүшкүннер бойдус камгалал хоойлужудулгазында 131 хажыдыышкынны илереткен, ооң иштинде аңныыр чурумун хажытканы дээш 61 административтиг херекти оттурган. Амгы үениң технологияларын ажыглаары, бойдус камгалал хемчеглериниң шынарын бедиткен деп, албан чери демдеглээн.
Тываның чазааның деткимчези-биле күрүне инспекторларынга «УАЗ» база «ГАЗ-Егерь» база «Трекол-Трофи» маркалыг харга, тулаага болгаш харга чоруур автомашиналарны, квадроциклдер, мотоциклдер, мотолуг хемелер болгаш «Север» деп аэрохемени хүлээткен. Оон ыңай дириг амытаннар камгалалында болгаш төтчеглекчилерге удур демисел ажылдарында навигаторлар, радиостанциялар, видеобүрүткекчи, спутниктиг телефоннар болгаш чылыг «көөр» камераларны хөйү-биле ажыглап турар.
2026 чылда албан чериниң автопарыгында доктар билбес чаа автомобильдер немешкен. Ужудукчу чок ужар аппараттарны болгаш амгы үениң чылыг «көөр» камераларын ажыглаарынче, ол ышкаш бөрүлер болгаш адыглар санын өйлеп-таарыштырар хемчеглерже онза кичээнгей угланган.
Комитеттиң тускай мергежилдиглери малчыннар болгаш көдээ чурттакчылар-биле профилактиктиг-методиктиг ажылды чорудуп, бөрүлер халдаашкынындан мал-маганны камгалаарының арга-сүмелерин берип турар. Бо хүнге чедир 300 ажыг кижиниң киржилгези-биле 68 аглаашкынны чоруткан. Ынчалдыр бирги чартык чылда 245 бөрүнү узуткаан.
Бойдус камгалалының хоойлужудулгазында хажыдыышкынарны илередип база ону болдурбазы-биле, чыл эгезинден бээр 660 рейдини организастаан. Чөпшээрел чокка аңнаары болгаш транспорт-биле октуг-боолуг чорууру – кол чурум үрээшкиннери бооп арткан.
Бир баш чиңге аңны болгаш дөрт баш черлик хаванны чөпшээрел чок аңнаанын тодараткан. Чурум үрекчилеринден 10 ок-боону, 12 дузакты, 23 какпаны хавырган.
