Тывада полиция ажылдакчыларының профессионал мергежилинге мөөрейни тургускан. Мергежил талазы-биле тергииннерни үш аңгы номинацияга тодарадыр – полиция участогунуң, хайгыыл-доскуул болгаш таңныыл-хайгаарал албанында полиция ажылдакчыларының аразындан мергежилиниң тергииннерин илередир. Республиканың чазаа ындыг мөөрейни эрттирер болгаш акшаландырар дугайында шиитпирни хүлээп алган. Ол ышкаш тиилекчилерни илередир негелделериниң дугайында дүрүмнү бадылаан.
Документиниң эгелекчизи ТР-ниң Иштики херектер яамызының дыңнатканы-биле алырга, мөөрей полиция ажылдакчыларының профессионал белеткелиниң деңнелин бедидеринче, айыылдыг байдалдарда даалгаларны шиитпирлээр билиг-мергежилин болгаш арга-дуржулгазын сайзырадырынче болгаш бедидеринче угланган. Ол бедик мергежилдиг ажылдакчыларны тодарадып, деткииринге, Иштики херектер яамызының органнарының удуртулгазынга составында кадрлар курлавырын хевирлээринге дузалаар.
Албан-дужаалынга бир чылдан эвээш эвес үеде ажылдаан, эки үнелелдиг болгаш чурум үрээн дээш хемчег албаан ажылдакчылар мөөрейге киржир. Ону чылдың-на эрттирер: майда – таңныыл-хайгаарал албанының болгаш түр када хоругдал черлериниң ажылдакчыларынга, июньда – участок шагдааларынга, июльда – хайгыыл-доскуул албанының ажылдакчыларынга. 2025 чылда бир дугаар мөөрейни эрттирген.
Мөөрейниң негелдези езугаар киржикчи бүрүзү албан-хүлээлге, эрге-хоойлу, от ажыдарынга, күш-шыдал болгаш эмчи белеткелинге айтырыг-харыыны эртер. Чижээ, от ажыдарынга чепсекти адырып-чыырынга, караже дүрген адарынга, күш-культура – дайынчы хүреш аргаларынга, тырттынарынга болгаш кросска белеткелин көөр.
Ажыл-чорудулганың адырының аайы-биле номинация бүрүзүнге тиилекчилерни болгаш шаңналдыг черлерни тодарадыр планнаттынган – участок шагдаалары, хайгыыл-доскуул база таңныыл-хайгаарал албаннарының ажылдакчыларының ажылының угланыышкыннары-биле номинация бүрүзүнге шылгараңгай ажылдакчыларны илередир. Тиилекчилерге акша шаңналдарын тыпсыр.
Тываның эрге-чагыргазы мөөрейниң дузазы-биле шагдаалар одуруунга хүлээлгезин эрттирер аныяктарны сонуургадып, хаара тударынга идегеп турар. Республиканың участок шагдааларынче 27 олут хостуг.
