ТР-ниң Өөредилге яамызының дыңнатканы-биле алырга, бо чылын республика девискээринге 175 (22 стационар, 4 майгын база 149 хүндүскү) лагерь ажылдаар. Тываның 6 хардан 17 харга чедир назылыг уругларның 26 хуузу, азы 18 муң ажыг уруглар чай дургузунда аңаа дыштаныр.
Тывада «изиг шугумну» чаңчыл езугаар ажылдадыр, ада-иелер ынаар долгааш, чайгы лагерьлерже путевкаларны садып алырын, ол ышкаш чайгы кадыкшыдылга дыштанылгазын организастаары-биле холбашкан өске-даа айтырыгларны шиитпирлээр. Республиканың немелде өөредилге хөгжүдер төвүнүң уругларның дыштанылга болгаш кадыкшылга килдизиниң 8 (39422) 2-72-92 дугаарлыг телефонунче долгааш, консультациялап болур.
Июнь 17-ге чедир агаар-бойдустуң байдалын көрүп, хоорайдан дашкаар кадыкшыдылга лагерьлери ажыттынар. Июнь 16-дан эгелеп, дүнеки доңнаттар эрте бээрге, майгын лагерьлери ажылын эгелээр.
Тываның Баштыңы Владислав Ховалыгның даалгазы-биле, чайгы сезон эгелээр мурнунда лагерьлерниң белеткелин хынаан. Республиканың удуртукчузу лагерьлерниң санитарлыг-гигиена болгаш өртке удур айыыл чок чоруун хандырар айтырыгларны онза хыналдага алырын дааскан. Өөредилге яамызының, өөредилге эргелелдериниң, Кадык камгалал, Онза байдалдар яамыларының, Росгвардияның болгаш Росхереглелхайгааралдың тускай
мергежилдиглеринден тургустунган албан черлер аразының комиссиязы лагерьлерни хынаан.
Cтационар лагерьлер девискээрлеринде айыыл чок чорукту, ол ышкаш санитарлыг нормаларга дүгжүп турарын база чугула эмчи курлавырларының бар-чогун хынаан. Комиссия бичии уругларның дыштанылга программаларынче онза кичээнгейни салган. «Бистиң уругларывыска лагерьге дыштанылга чүгле хөглүг эвес, а айыыл чок болур ужурлуг» – деп, тускай мергежилдиглер демдеглээн.
Тывага 2025 чылдың чайгы кадыкшыдылга кампаниязын организастаарынга 3 муң ажыг кижини хаара тудар, оларның аразында лагерь начальниктери, аъш-чем хандырылгазының ажылдакчылары база вожатыйлар бар.
Тывада уруглар лагерьлери-биле чергелештир, бүдүн республикада 200 ажыг түр үениң дыштанылга төптери ажылдап эгелээн, аңаа уруглар чайгы дыштанылганың дургузунда солун болгаш ханы уткалыг үени эрттирер.
