Республиканың оолдары болгаш уруглары «Күзелдер шивизи» ачы-буян акциязының сайтызынче 319 чагааны чорутканын ТР-ниң Өөредилге яамызы дыңнаткан.
Чаа чылдың шизинден уругларның күзелдерин бижээн саазын үш «ойнааракты» Тываның Баштыңы Владислав Ховалыг дүжүргеш, республиканың девискээринге бүгү-российжи акцияны ажытканын сагындыраал. Тываның Баштыңы беш харлыг Давааның, тос харлыг Элионораның болгаш чеди харлыг Тэнзинниң күзелдерин күүседир болган.
Чыл санында уругларның күзелдерин чазактың кежигүннери, яамыларның, албан черлериниң удуртукчулары, сайгарлыкчылар болгаш хөй-ниити ажылдакчылары боттандырып турар.
“Баштайгыларның шимчээшкини” уруглар болгаш аныяктарның бүгү-российжи шимчээшкининиң региондыг салбыры «Күзелдер шивизи» акцияны ноябрь 15-те эгелээн. Хемчег 2025 чылдың февраль 28-ке чедир уламчылаар.
2018 чылдан тура бүгү чуртта эртип турар акция буянныг үүле-херек кылыксаан кижилерни чылдың-на хаара тудуп турар. Алды катап эрткен акцияның организаторлары болгаш киржикчилери 210 муң ажыг уругнуң күзелдерин боттандырган.
«Күзелдер шивизи» төлевилел уругларның Чаа чыл күзелдерин боттандырыптар күштүг. Соок-Ирей болуксаар кижи бүрүзү ёлкажеланий.рф сайтыга бүрүткедип алыр.
