Тывадан кадеттер Россияны Индияга төлептиг төлээлээн

Кызылда президентиниң кадет училищезинден делегация Индия Республиканың хүнүнге тураскааткан байырлалга киришкен. Республика хүнүн байырлаан программаже найыралдыг чурттардан аныяктар солчулгазын организастаан.

Бо чылын программада 19 күрүнениң – Россия, Великобритания, Индонезия, Казахстан, Киргизия, Вьетнам, Бутан, Фиджи, Сейшель ортулуктары, Мозамбик, Уганда, Непал болгаш өске-даа чурттардан делгациялар кирген. Бистиң чуртувусту Кызылда президент кадет училищезиниң начальниги Уран-кыс Ондар баштаан кадеттер делегациязы төлээлээн.

Тываның Баштыңы [id360104045|Владислав Ховалыг] бодунуң блогунда делегей чергелиг улуг болуушкунда тыва кадеттерниң киржип турарын, бистиң оолдар, уругларывыс аңгы-аңгы хемчеглерде идепкейлиг киржип, Индияның улуг албан-дужаалдыг кижилери-биле ужуражып, төөгүлүг болгаш культурлуг тураскаалдары-биле таныжып турарын дыңнаткан. Олар Индияның камгалал сайыды база премьер-министри Нарендра Модиниң албан езунуң хүлээп алыышкынынга база чораан.

Уран-кыс Сергеевна Ондар Индияның камгалал сайыдынга тураскаалдыг суй-белекти тудускан. Кызыл училищезиниң кадеттериниң киришкени Индияның Республика хүнүнге тураскааткан Дели хоорайның Национал Кадет корпузунуң байырлыг чыскаалы – кол болуушкуннарның бирээзи болган.

– Аныяктар солчулгазының делегей программазында бистиң Кызылдың президентиниң кадет училищезиниң делегациязы Россияны төлээлеп киржип турары канчаар-даа аажок чоргааранчыг-дыр. Кадеттеривис бистиң чуртту төлептиг төлээлээннер. Тыва кадеттерниң англи дылда тулган эки чугаалаарын, чазадаан болгаш сцена культуразын кончуг эки сагып билирин хемчегниң организаторлары болгаш өске-даа киржикчилери демдеглээн – деп, Тываның Баштыңы бодунуң блогунда бижээн.

Кызылда президентиниң кадет корпузунуң делегациязы Россия биле Тываны төлээлээн культура программазын байырлалда таныштырган. «Тываже аян-чорук» видеороликти көргүзери, российжи культура болгаш уран чүүл дугайында таныштырылга, Лев Толстойнуң «Дайын болгаш тайбың» романындан кыска үзүндүнү күүседири база «Найырал» деп орус-тыва плясканы самнаары программаже кирген. Россияның кадеттери англи дылды билири, сагылга-чуруму база бедик белеткели-биле тулган демдектерге төлептиг болган.

Тыва оолдар, уруглар Индияның культурлуг байлак өнчү-салгалын сонуургап, индий Национал Кадет корпузунуң кадеттери-биле найыралдың ужуун сыптаан.