Тускай шериг опреациязының девискээринче кышкы ачы-дуза чыылдазында 10 мотоциклди чорударын Ниити-российжи улусчу фронтунуң Тывада салбырының удуртукчузу Саима Далчин дыңнаткан.
Фронтуда шериг албан-хүлээлгелиглер мотоциклдерни база дилээн. Республиканың муниципалдыг тургузуглары ону боттарында хүлээнип алган.
– Мототехника база автотранспорт аймаа дыка херек. Спортчу даг мотоциклдери орук чок черлерге тура дүшпес хөлге ол. Ооң-биле балыгланган оолдарны дажыглап, турушту дүрген солуурунга дузалажып, ок-боону, суксунну дээш, өске-даа чүүлдерни чедирери эптиг – деп, Саима Далчин чугаалаан.
Бо хүннерде муниципалитеттерде ачы-дуза чыыр тус чер пунктуларында ажыл кидин түлүк. Тываның чурттакчылыг суурларында организациялар болгаш ажылчын коллективлер аал-чуртундан ыракта дайынчы хүлээлгелерин күүседип чоруур чаңгыс чер чурттугларын деткиир буянныг херекте үлүүн киириштирген. Олар техниктиг дериг-херекселдерни, генераторларны, чылыг үрдүрер херекселдерни чыгган.
Чон чылыг хеп аймаан, эм-таңны, газ-биле ажылдаар суугуларны, чылыдыкчыларны дээш, өске-даа чугула херек чүүлдерни чыылда пунктуларында хүлээдип турар. Кожууннарда белеткээн чүъктү тускай график-биле ноябрь 26-дан эгелеп республика төвүнче сөөртүп, хүлээдир.
Республиканың 1 дугаар эмнелгези шериглерниң хереглелинге дээш доктар билбес «УАЗ» биле «ГАЗель» маркалыг ийи автомобильди чорударынга белеткээн. Ол ийи машинаны ыяк септеп, кышкы дугуйларны кедирип, хөделдирер база чаар-тудар кезектерин чаартып солаанын эмнелгениң удуртулгазы дыңнаткан. «Бо машиналарны корпустар аразынга аарыг кижилер дажыглаарынга ажыглап турган. Ам тускай операция девискээринде бистиң дайынчыларывыска бараан болур үези чедип келгени ол» – деп, кол эмчиниң оралакчызы Болат Ховалыг тайылбырлаан.
Республика эмнелгезинден аңгыда өске черлер база ачы-дузаламчызын дамчыткан. Чижээ, туберкулезка удур диспансер элээн каш шериг идиктер болгаш бүрүнү-биле чүмнеттинген медицина барбаларын хүлээткен. Наркология диспансери госпитальдарже орун-дөжек херекселдерин база аржыылдарны, «ЦСКА-Тыва» спорт школазы эмчи дериг-херекселдерин, "Восток" кызыгаарлаан харыысалгалыг ниитилел техниктиг септелге материалдарын, дериг-херекселдерни база мотоциклди, эки турачылар пунктулары «чажыртынар» четкилерни дамчыткан.
Бо удаада чорудар чүък Чаа чыл бүдүүзүнде чеде бээри-биле онзагай. Ынчангаш оолдарже үш хире тонна доңурган эътти, тыва школачыларның чылыг чымчак болгаш деткимчениң сөстерин илереткен өңгүр чараш ажык чагааларын чорудар.
Декабрьның 12-13 хүннеринде хөй тонна чүък чүдүрер улуг машина Кызылдан үнүптер. Неделя хире болгаш, Луганск Улус Республиканың Свердловск хоорайга чеде бээр.
Бистиң шериглеривиске дуза кадыксаан азы Чаа чылдың посылказын фронтуже чорудуксаан кижилер ону декабрь 10-га чедир эккеп хүлээдир арга бар. Кызылда Ниити-российжи улусчу фронтунуң регионалдыг күүскомунуң дараазында адрезинде ачы-дузаны чыып турар: Тыва эки турачылар кудумчузу, бажың 3, телефон: 8(39422)2-10-50.
Ачы-дуза чыылдазының кампаниязы «Шупту чүүлдү Тиилелгеже!» федералдыг төлевилел күүселдези-биле чоруп турарын сагындыраал.
