Россияның Президентизи Владимир Путин Тывадан тускай шериг операциязының киржикчизи Айдысмаа Монгушту шаңнаарын шиитпирлээн. Тывадан тускай шериг операциязының киржикчизин күрүне шаңналынга киирер.
Март 8-тиң бүдүүзүнде, Россияның Президентизи херээжен чон – «Ада-чурт камгалакчылары» күрүне фондузунуң ажылдакчылары, тускай шериг операциязының киржикчилери болгаш хоочуннары-биле ужуражырын шиитпирлээн.
Бүгү делегейниң херээженнер хүнүнүң бүдүүзүнде, Москваның тускай шериг операциязының киржикчилеринге болгаш оларның өг-бүле кежигүннеринге деткимче көргүзер чаңгыс аай төпке ужуражылганы эрттирген. Хемчегни интернет четкизинге дорт дамчыткан. Херээжен улус күрүне баштыңынга айтырыгларны салгаш, фондунуң ажылының аңгы-аңгы адырларынга хамаарыштыр санал-оналдарны киирген.
Амгы үеде шериг албан-хүлээлгелиг Айдысмаа Монгуш Президент-биле ужуражылгага Тываны төлээлеп киришкен. Тываның Баштыңы Владислав Ховалыг бистиң чаңгыс чер-чуртуувустуң киришкени дамчыдылганың кезээн бодунуң социал четкилерде арынынга салган. «...эмчи сестразы шериг керээзин чарган. Амгы үеде эвакуация взводун командылап турар. Үш ажы-төлдүң авазы» – деп, Владислав Ховалыг тайылбырлаан.
Айдысмаа Монгуш амгы үеде бүгү чуртта билдингир, кымны-даа тоомча чок арттырбаан бодунуң төөгүзүн Президентиге чугаалаан. Өөнүң ээзи Омак Дажы 2023 чылда тускай шериг операциязының киржикчизи болур деп шиитпирлээн. Эмчи эртемниг херээжен кижи өскээр чайладыр көжүрер взводтуң эмчизы кылдыр ооң соондан аъттаныпкан. Халдаашкын ротазының кежигүнү болур ооң өөнүң ээзи дайынчы даалгаларны күүседип тургаш, маадырлыы-биле мөчээн. Айдысмаа ону билип кааш, ашааның эштери-биле кады дайын шөлүнче чорупкаш, өөнүң ээзиниң мөчүзүн үндүрүп алган.
«Мээң шериг эмчизи даалгам доозулган. Ам ажы-төлүвүстү кижизидер улуг харыысалга менде онаашкан. Ие болгаш дайын хоочуну кижи болганымда, шуптувуска тайбың дээрни күзедим» – деп, Айдысмаа чугаалаан.
Ужуражылга киржикчилериниң бирээзи эрес-дидим болгаш маадыр чоруун көргүскен бо херээжен кижини шаңнаарын сүмелээн. Күрүне баштыңы аңаа чөпшээрешкен. Владимир Путин дыңнааны бо төөгүнү салгалдарда тарадыры чугула деп чугаалаан. «Шак мындыг төлептиг салым-чолдарны, төөгүнү номнарга, шүлүктерге, уран-чечен киноларга, чогаалдарга мөңгежидип артырып, көргүзер херек» – деп, Президент чугаалаан.
«Ада-чурт камгалакчылары» фондунуң даргазы Анна Цивилеваның чугаазы-биле алырга, фронтуже катап келбезин дээш Айдысмаа Монгуштан чеже-даа дилээн, ынчалза-даа ол ажыл-чорудулгазын уламчылавышаан. Күрүне баштыңы тускай шериг операциязының девискээринче ам чорбазын Айдысмаадан боду дилээн. «Силерниң ажы-төлүңер бар-дыр, оларны бут кырынга тургузар херек. Авазы чанынга турар ужурлуг» – деп, Владимир Путин чугаалаан. Ие кижиге херек бүгү дузаны көргүзерин Президент база аазаан. Тываның Баштыңы Владислав Ховалыг Айдысмаа Монгушту төрээн республиказында бүрүнү-биле деткиирин бодунуң арынында дыңнаткан.
Айдысмаа Монгуштуң чугаазының соонда, Анна Цивилева ужуражылгага келген херээженнерниң хөй кезии «берге салым-чаяанныг» болганын демдеглээн, ынчалза-даа олар боттарының ачы-буянын, энерел сеткилин салбааннар. «Олар берге байдалдарны чүгле шыдажып эртер күштү тыпкан эвес, а чүс-чүс, муң-муң өске кижилерге дузалажыр күштү тыпканнар» – деп, ол демдеглээн.
