2026 чылда аварийлиг чуртталга бажыңнарын көжүрер талазы-биле федералдыг программаның чаа чадазы эгелээр. 22 регионнуң санынче Тыва база кирген. Ол дугайында Россияның Чазааның Даргазының оралакчызы Марат Хуснуллин дыңнаткан. Чазак Даргазының оралакчызының дыңнатканы-биле алырга, программа езугаар 32,2 муң кижи чаа бажыңны алыр.
Президент Владимир Путинниң эгелээшкини-биле боттандырган «Амыдыралга инфратургузуг» национал төлевилелдиң бо шиитпири «Чаңгыс демниг Россияның» Улусчу программазының бир кезээ болур.
«Чурттаар арга чок бажыңнарда ам-даа 211 чаңгыс чер чурттугларывыс федералдыг деткимчениң ачызында амгы үениң чаагайжыткан квартираларынче көжүп кирер. Республикага 378 сая рубльди тускайлаан, ол 2017 чылдың январь 1-ге чедир аварийлиг деп санаттынган үш муң ажыг дөрбелчин метр чуртталга фондузундан хамаатыларны өскээр көжүрер арганы бээр» – деп, Тываның Баштыңы Владислав Ховалыг бодунуң МАХ мессенджерде бодунуң каналынга дыңнаткан.
Тыва ийи чыл дургузунда ниитизи-биле 2,9 муң дөрбелчин метр эргижирээн чуртталга бажыңнарындан чурттакчыларны көжүрер. Федералдыг бюджет акша-хөреңгизинге немей регионалдыг акшаландырыышкынны салыр. Республика чазааның федералдыг төп-биле системалыг кады ажылдажылгазының түңнелинде, акша-хөреңгини тускайлаар дугайында шиитпир хүлээп алдынганын Тываның Баштыңы демдеглээн.
«Республиканың чуртталга фондузун чаартып, чурттаарынга таарымчалыг байдалдарны тургузары бистиң мурнады боттандырар айтырыывыс болуп артпышаан. Тываны деткип, регионнуң чурттакчыларының хереглелдеринче кичээнгейни салып турары дээш чурттуң Чазаанга база Девискээрлер хөгжүлдезиниң фондузунга четтиргеним илереттим» – деп, ол демдеглээн.
Президентиниң даалгазы-биле 2008 чылда Россияга аварийлиг бажыңнардан хамаатыларны өскээр көжүрер ажылдар эгелээн. 2019 чылдан тура программа национал төлевилел составынче кирген. Чүгле сөөлгү беш чылда Тывада 500 кижи ол программа-биле чурттаар оран-сава байдалын экижиткен. Ол үениң дургузунда хөй квартиралыг 14: Кызылда алды, Хову-Аксыда сес бажыңын тудуп, ажыглалче киирген.
Республика 2017 чыл соонда аварийлиг чуртталга бажыңнарындан 41 кижини көжүрер дээш, 2025 чылдың сентябрьда 70,2 сая рубль немелде федералдыг акшаландырыышкынны алган.
