“Национал аъш-чем бүдүрер төп” кызыгаарлаттынган харыысалгалыг ниитилел чоннуң улуг сонуургалын оттурган хоорган чиңге-тараа, курут, пөш тооруу холаан шоколадтарны, тыва “чокопайны”, арбай далганындан эртенги чемни, “тыва доңурганы” бүдүрүп турар.
Эрткен чылын “Ава шайы” деп тыва сүттүг шайны бүдүрүп эгелээн. Улугларның-даа, бичиилерниң-даа ынак чигирзиг чеми – “тыва доңурганың” кол кезээ өл ааржы. Национал аъш-чем бүдүрер төп хүнде 1600 чаагай доңурганы бүдүрүп турар.
Бүдүрүлгениң чиңгине директору Кежик Кууларның чугаазы-биле алырга, “тыва доңурганы” 2015 чылдан тура бүдүрүп эгелээн.
– 2015 чылда хөйге билдингир апарган “тыва доңургадан” аңгыда курут, тыва “чокопай”, “Арбай” деп эртенги чемни бүдүрүп эгеледивис. Ам ыт-кадындан хаптаан шайны бүдүрер деп тур бис. Чиг эт тус черниң болганда, кызагдаашкыннар биске моондак болбаан – деп, сайгарлыкчы ажылын таныштырган.
Национал аъш-чем бүдүрер төп тыва кухняның чаңчылдарының кадагалакчызы деп болур. Бүдүрүлге сүттен, арбай, чиңге-тараадан кылган экологтуг арыг амданныг чемнерин ярмарка-делгелгелерге доктаамал бараалгадып турар.
Тус черниң барааннарын бүдүрүп турар сайгарлыкчылар ТР-ниң Чазак Даргазының оралакчызының хүлээлгезин күүседип турар Менги Кара-оолдуң хууда хүлээп алыышкынынга келгеш, бичии оран-саваны хөлезилеп турарының дугайында дыңнаткан турган. Оралакчы дарга Үлетпүр парыгының девискээринге бүдүрүлге шөлдерин тударынга чер участогун аңгылап бээрин шиитпирлээн.
