Тывага бүдүрген: «Вавиол»

Тывада «Вавиол» компаниязы Тываның социал-экономиктиг хөгжүлдезининиң амы-хууда программазының чорудуу-биле күрүне деткимчезин алгаш, бойдус байлаан болбаазырадыр комплекстиң төлевилелин боттандырып турар. «Вавиол» компаниязы – Тывада экологтуг арыг бараан бүдүрер улуг бүдүрүлге.

Тывага бүдүрген продукция дээрге эң арыг болгаш шынарлыын компания бадыткап, эм оъттарлыг шайлардан чаагай чыттыг хол-биле кылган саваң дээш ниитизи-биле 300 ажыг янзы барааннарны бүдүрүп турар. Бүдүрүлгеде 28 кижини ажылда хаара туткан.

Амгы үеде компания кат-чимис хүлээп, чыыр болгаш шыгжаар белеткел пунктуларын ажылдадырынга белен. Алды тонна кат хүлээп чыыр, көжүп чоруур тускай соодукчулуг пунктуну садып алган. Болбаазырадылга цегинде 150 тонна чиг эт шыгжаар соодукчулуг шыгжамырны туткан.

Компания бойдус байлаан болбаазырадырынга херек дериг-херекселди садып ап, ону тургузар оран-саваны септеп турар. Цехтеринде тыва ары чигири, бальзамнар, варенье, шоколад, янзы-бүрү кат-чимис амданныг суксуннарны, эм оъттар чыындызын бүдүрүп эгелээн. Ол ышкаш бойдустуң байлаан хүлээп алыр, ылгаар пункту, кат-чимис шыгжаан соодукчулар бар. Чүге дизе тайгадан чыгган катты дужааган дораан-на болбаазырадып турар.

Бирги цехке катты чуггаш, ылгаан соонда буска хайындырар. Ийиги цехке ханды болгаш морстарны хуваай кудар. Варенье биле джемнерге бодаарга, хереглекчилер суксунну 10 катап хөйнү садып ап турарын хууда сайгарлыкчы Виктор Тунев дыңнадып турар. Аңаа чергелештир “Саян суу” деп ижер сугну хуваай кудар. Үшкү цехке Тываның билдингир демдээ болур суй белектерни бүдүрер.

“Вавиолдуң” чаа бүдүрген “Чуксугбай-ЭМ” деп хайындырып ижер эм шынарлыг оът чоннуң сонуургалын оттурган.

Бойдус байлаан болбаазырадыр бүдүрүлгеге 60-80 ажылчынны доктаамал, 30 муңдан эвээш эвес кижини сезоннуг ажылдарже хаара тударын планнаан. Бо төлевилелде кол чүүл – тус черниң чурттакчыларының оран-тандызындан доктаамал орулгалыг болуру.

2024 чылда бүдүрүлге бүрүн күжү-биле ажылдап эгелээш, 30 тонна кат-чимисти, 10 тонна ары-чигирин, 10 тонна тайга торуун, 30 тонна өске-даа бойдус байлактарын болбаазыраткаш, бүдүрүп, 1000 хире декалитр минералдыг сугну савалап турар апаар.