Бо неделяда Тывага спорт мөгейикчилериниң четтикпейн манап турары онзагай болуушкун болур. Россияның спорт фондузунуң деткимчези-биле дзюдога эр болгаш херээжен спортчулар аразынга Россияның Fonbet Кубогунуң маргылдаазын республика бир дугаар эрттирер.
Июнь 19-тан 21-ге чедир регионда эң улуг «Тиилелге» хөй ажыглалдыг спортчу-культура төвүнүң шөлүнге маргылдаа болуп эртер. Тыва мындыг деңнелдиг маргылдаага баш бурунгаар белеткенген.
Тываның Баштыңы Владислав Ховалыг Россияның Дзюдо федерациязының президентизиниң оралакчызы Валентин Хабиров-биле ооң белеткелин сайгарып чугаалашкан турган. Маргылдааны эрттирери республикага алдар-хүндү-даа, улуг харыысалга-даа дээрзин ол ынчан демдеглээн.
Федералдыг болгаш регионалдыг дзюдо федерациялары база Тываның спорт яамызының удуртулгазы-биле республиканың оргкомитеди ол маргылдааны эрттирер. Дзюдога чурттуң ийиги улуг национал маргылдаазынга бүгү чурттан үш чүс хире спортчу медальдар дээш демисежири баш бурунгаар билдинген.
Республиканың чыында командазын самбога делегейниң үш дакпыр, Россияның тос дакпыр чемпиону Саян Хертек удуртуп баштаар. Оон аңгыда Тываның шыырак мөгелери: 2025 чылда Россия чемпионадының хүлер медалының эдилекчизи, спорт мастери Каң-Демир Сүге-Маадыр, Сибирь федералдыг округ чемпиону Делег Ондар, Сибирь федералдыг округтуң бирги чери дээш маргылдааның хүлер медалының эдилекчизи Начын Күжүгет, 2011 чылда Россия чемпионадының хүлер медаль эдилекчизи Каң-Демир Балчакпан, Сибирь федералдыг округ чемпионадының хүлер медалының эдилекчизи, спорт мастеринге кандидат Шолбан Куулар, 2026 чылда Сибирь федералдыг округ чемпиону, спорт мастеринге кандидат Азияна Данзы-Белек командаже кирген.
2025 чылдың Россия Чемпионадының федералдыг округтар аразынга командалыг саннар түңнери-биле маргылдаага киржир эрге тодараттынган. Бирги черден дөрткү черни ээлээн регионнар деңзи бүрүзүнге алды спортчуну, а бештен он дугаар черлер алган регионнар дөрт спортчуну төлээлээр эргени алган.
Дзюдога Россия Кубогунга киржир спортчулар медальдарның он дөрт комплектизи база шаңнал фондузунуң үлүү дээш демисежир. Тиилекчилер 100 муң рубль, мөңгүн медаль эдилекчилери – 75 муң, хүлер медальдыглар – 50 муң рубльди алыр.
Маргылдааның байырлыг ажыдыышкыны июнь 19-та, пятницада, 18:00 шакта эгелээр. Баштайгы ужуражылгалар хүннүң-не 13:00 шакта, финал хүрештер 18:30 шакта болур. Пятницада 60 биле 66 кил деңзилиг эр, 48 биле 52 кил деңзилиг херээжен мөгелер аразынга маргылдаалар эгелээр. Июньнуң 20-де, субботада, эр улустуң 73 биле 81 кил деңзилиг, а херээжен улустуң 57 биле 63 кил деңзилиг мөгелеринге маргылдаалар болур. Улуг-хүнде, июньнуң 21-де, төнчү салыглар болур: эр мөгелер 90, 100, 100 килден өрү деңзилерге, а херээжен мөгелер 70, 78, 78 килден өрү деңзилерге хүрежир. Дөрт дугаар хүнде, июнь 18-те, төлгелерни тырттар.
Маргылдааны Россияның дзюдо федерациязының сайтызынга, федерацияның социал четкилерде база «МатчТВ» каналдың курлавырынга дорт дамчыдар.
Дзюдо – Тывада спорттуң кол хевирлериниң бирээзи. Тыва Республиканың дзюдога чыынды командазында 400 ажыг спортчу бар, оларны спортчу школалардан 19 тренер башкы белеткеп турар.
«Тывада дзюдо нептереңгей хевир, күштүг спортчу школавыс бар, салым-чаяанныг спортчуларывыс хөй. Мындыг маргылдааларны республикага эрттирери, спорттуң бо хевирин хөгжүдеринге идигни берип, хөй аныяктарны секцияларже хаара тудар дээрзинге бүзүрээр мен» – деп, Владислав Ховалыг чугаалаан.
Эрткен чылын Россияның кубогу Череповецке болуп эрткен, аңаа чурттуң 50 регионундан 300 ажыг дзюдо мөгези чыылган. Ынчан тыва спортчу Каң-Демир Сүге-Маадыр 60 килдиг мөгелер аразынга үшкү черни ээлээн.
