Тываның Баштыңы Владислав Ховалыг Дээди Хуралга Айыткалында, Тываның тудуг техникумунуң баазазынга Профессионал эде белеткел төвүн ажыдар даалганы регионнуң Өөредилге яамызынга берген.
Төп ажыл берикчилериниң дилээ-биле специалистерниң мергежилин бедидип, профессонал белеткелин чорудар.
Владислав Ховалыг даалганы берип тура, профугланыышкынныг ажыл школа – техникум – дээди өөредилге чери – мергежилдиг кадрлар деп, чаңгыс шугум-биле чоруур ужурлуг деп айыткан.
Эрткен чылын Тывада «Профессионалитет» федералдыг төлевилел боттандырылгазы-биле тургусканы ышкаш төптү ажыдар планныын регионалдыг Өөредилге яамызы дыңнаткан. Ол төлевилел боттандырылгазы-биле Кызыл, Чадаана хоорайларда, Сарыг-Сеп база Балгазын суурларда техникумнарның көдээ ажыл-агый угланыышкынында беш чүс ажыг сургуулдар өөренип турар.
Ам төпке чыл санында-ла дөрт муң ажыг кижи мергежилин бедидип, профессионал эде белеткелди эртип болур. Бүдүрүлгелерниң ажылдакчыларын өөредип алыр дээн дилээ езугаар, төп өөредилге программаларын боттандырар.
Школачыларга профугланыышкынныг хемчеглерни, мергежилдерге шенелделерни чорудар. Төптү амгы үениң дериг-херекселдери-биле четчелээрин, яамызы дыңнаткан.
Сибирьниң хөгжүлде эчис сорулгазында көрдүнген улуг инвестиция төлевилелдериниң боттандырылгазын өөренип көргеш, Тываның Чазаа 2025 чылга чедир күш-ажылчы курлавырларга хереглелди хевирлеп тургускан. Документиде Тывага хамааржыр 31 хемчег кирген, ооң санында 11 улуг даг-тывыш инвестиция төлевилелдери бар.
Тываның Баштыңы республиканың тудуг адырынга чугула херек мергежилдиг кадрлар курлавырын тургузар даалганы база берген турган.
