Тываның камгалакчылары часкы суг үерин айыыл чок эрттирип, арга-арыг өрттерин болдурбазы-биле командалыг штаб өөредилгелерин эрттиреринге белеткелди эгелээн.
Хар улуг дүшкенинден суг үерлээшкини болуп болурунуң айыылының улуг. Агаар хайгааракчыларының дыңнатканы-биле алырга, бо чылын хар нормадан 1,5 катап хөй, чамдык черлерде харның кылыны 40 сантиметр чедип турар. Марттан апрель төнчүзүнге чедир хар дүрген эриир болза, чамдык чурттакчылыг черлерде чуртталга бажыңнары болгаш огород участоктары сугга алзыптар чадавас деп, эксперттер сагындырган.
Кызылдың оң талакы дачалар ниитилелдериниң девискээрлери, кожзавод, Орбита база Вавилин ээтпээ айыылдыг девискээрлер кылдыр айыттынган. Каа-Хем суурда, «Дар» огородчу ниитилелде, куш фермазының девискээрлери, Оттук-Даш суур үерге алзып болур. Сарыг-Сеп, Дерзиг-Аксы, Элегес, Тоора-Хем, Сыстыг-Хем, Чазылар суурларда үер айыылы улуг. Мөңгүн-Тайга, Каа-Хем, Өвүр, Таңды, Чеди-Хөл, Эрзин база Тес-Хем кожууннарның автооруктары база чскы үерге когарап болур.
Тываның Баштыңы Владислав Ховалыг муниципалдыг удуртукчуларга чурттакчы чонну болгаш девискээрлери эрээн база дагдан баткан суглардан камгалаар хемчеглерни организастаарын дааскан. Ол хемчеглерниң аразында оруктарны болгаш өрегелерин девискээрлерин хардан, суг эрттирер хоорзаларны дош болгаш боктардан арыглаары, кудумчуларда сугну сордурары, эрээн суг бадар системаларны болгаш суг арыктарын аштаары дээш, оон-даа өске ажылдарны чорудар.
Владислав Ховалыг часкы үерниң уржуктары-биле демисежирде ажыглаар аар болгаш тускай техниканы белеткээрин чагырга даргалары боттары харыылаарын айыткан. Оон аңгыда онза байдалдар үезинде херек материалдыг курлавырны – аъш-чем продукциязындан эгелээш эмнер болгаш херекселдерге тургузарын, камгалал чалдар кылыр черлерни тодарадырын сагындырган.
