Өвүр кожууннуң Монгуш Доржу аттыг үлегер-майыктың төп ном саңының ажылдакчылары билдингир шүлүкчү Менги Бузураш-биле "Тывалап-ла ораалыңар" деп ужуражылганы эрттиргенин ном саңы дыңнаткан.
Менги Доваторовнаның чогаадыкчы ажыл-чорудулгазының база ооң чырыкче үнген номнарының таныштырылгазын чурт шинчилел килдизиниң эргелекчизи чыылганнарга таныштырган.
Өвүр кожууннуң Төлээлекчилер хуралының даргазы, "Улаатай" чечен чогаал каттыжыышкынының удуртукчузу А-Х. И. Лопсан-Серен, кожууннуң социал политика талазы-биле оралакчызы Ч. Т. Шойдан чаңгыс чер чурттуунуң чогаадыкчы салым-чаяанын болгаш тыва чонунга кылып чоруур хөй-ниити ажыл-ижин бедии-биле үнелеп, М. Д. Бузурашка "Өвүр кожууннуң алдарлыг шүлүкчүзү" деп бедик атты, хөрек демдээн чонунуң мурнундан байыр чедирбишаан, тывысканнар.
"Улаатай" чечен чогаал каттыжыышкынының төлээлери Тывада билдингир шүлүкчүлер Кежик Кошкар-оол (Дус-Даг Оглу), Зинаида Монгуш оларның сактыышкыннарын, шүлүк, ыры күүселделерин уран чогаал мөгейикчиери улуг сонуургал-биле дыңнааннар.
Хемчегниң эрттирикчилери, шүлүкчүнүң чоок кижилери, келген аалчылар чылыг-чымчак күзээшкиннерни, солун сактыышкыннарны үлежип, чугаалап турганнар.
Ужуражылганың төнчүзүнде шүлүкчү М. Д. Бузураш келген аалчыларга өөрүп четтиргенин илеретпишаан, айтырыгларга харыылап, солун сактыышкыннары-биле үлешкен.
Хемчегге келген номчукчулар, кожууннуң хүндүлүг хоочуннары база улуг-биче аалчылар Меңги Доваторовнаның ажыл-ижи, чогаалдарының дугайында хөйнү билип алганнар.
