Россияның кеземче күүселдезиниң Тывада эргелелинге «Тувамедиагрупп» медээлер агентилелиниң болгаш «Тувинская правда» солуннуң журналистери Шончалай Ховалыг биле Кирилл Самохваловка Россияның Кеземче күүселдезиниң федералдыг албанының директору, иштики албанның генералы А.А. Гостевтиң адын салган Хүндүлел бижиктерни байырлыг байдалга тывыскан. Олар ук албан чериниң Информация төвүнүң хөй-ниити чөвүлелиниң кежигүннери.
Эргелелдиң начальнигиниң хүлээлгезин күүседип турар Олег Тодояков шаңнатканнарга байыр чедирип, ажыл-ижинге чедиишкиннерни күзээн.
Шончалай Ховалыг он ажыг чылдарның дургузунда Россияның кеземче күүселдезиниң Тывада эргелелиниң ажыл-чорудулгазын чыдырып келген. Журналист ажыл-ижиниң аайы-биле албан чериниң көдээ ажыл-агыйларынга, истелге изоляторунга, хоругдал черлериниң ногаа шыгжамырынга, кежээки ниити өөредилге школазы болгаш профессионал училищезинге, автотранспорт хереглелин хандырар болгаш септээр, даараныр, эт-сеп чазаар, ыяш болбаазырадыр, арга-ыяш белеткээр, демир-дес аймаандан ус-дарган ажылдар, алгы-кеш эттээр, консерва бүдүрер, чарба-көже болгаш далган бүдүрер цехтерге четкен.