«Россия – арга-шинектер чурту» президент шөлчүгежиниң эң улусчу төлевилели «Бистиң өг-бүлевистиң-дир» деп мөөрейниң ийиги сезонунга бүрүткел доозулган. Бо чылын мөөрей «Өг-бүле» деп национал төлевилелдиң бир кезээ апарган.
Төлевилелдиң тиилекчилеринге чурттаар оран-сава байдалын экижидип алырынга беш сая рубль үнелиг 60 сертификатты тыпсыр, а финалче кирген өг-бүлелер Россияның девискээринге аян-чорукчулаар арганы алыр.
Мөөрейге киржир кылдыр сөөлгү үш чартык ай дургузунда 726 муң ажыг билдириишкин кирген, ооң иштинде Тыва Республикадан 679 өг-бүле командаларындан 2500 ажыг кижиден.
Организакчыларның дыңнатканы-биле алырга, октябрь 1-ге чедир мөөрейниң ырактан киржир баштайгы чадазы доостур, ооң түңнел шенелдези – Россияның төөгүзүн болгаш культуразын билиринге викторина болур. Киржикчилер янзы-бүрү темаларга, ооң иштинде чогаадыкчы, культура, төөгү, өг-бүле чаңчылдары болгаш эки турачы ажылдарга даалгаларны этосемейное.рф деп сайтыда өг-бүлезиниң хууда арыны таварыштыр көрүп болур. Бо даалгаларның аразында Хыналда чөвүлелиниң кежигүннериниң болгаш мөөрей партнерларының шылгалдалары база бар.
«Россияның Президентизи Владимир Путин төлевилелди «Бистиң өг-бүлевистиң-дир» деп адааны анаа эвес. Ийиги сезоннуң киржикчилери амгы үеде боттарының ук-ызыгуурун шинчилеп, салгалдан салгалче дамчып келген чаңчылдарын таныштырып, ниити сонуургалдарын дилеп, даалгаларын күүседип турар.
«Бистиң өг-бүлевистиң-дир» дээн ышкаш төлевилелдер бистиң культурлуг ылгалывысты кадагалап арттырарынга улуг үлүг-хуузун киирип турар деп бодаар мен. Олар Төрээн чуртунга бердиниишкинниң болгаш ынакшылдың, күш-ажылга хандыкшылдың дөзү өг-бүледе салгалдан салгал дамчып келген үндезин билиглерниң күжүнде дээрзин биске сагындырып турар. Бо бүгү Россияны чаңгыс демниг болгаш күштүг кылып турар» – деп, Россия Федерациязының Чазааның Даргазының оралакчызы Татьяна Голикова демдеглээн.
Ырактан киржир чаданың түңнелдери-биле мөөрейниң чартык кезээниң тиилекчилери тодараттынган, олар округтуң чартык финалынга боттарының регионнарын төлээлээр. Өг-бүлениң командазы округтуң чартык төнчү мөөрейинче эрткен дугайныда медээни этосемейное.рф сайтыда өг-бүлениң хууда арынынга дыңнадыптар. А 2026 чылдың чайын, Өг-бүле, ынакшыл болгаш шынчы чорук хүнүнде, «Бистиң өг-бүлевистиң-дир» мөөрейниң ийиги сезонунуң финалы болуп эртер.
«Бистиң өг-бүлевистиң-дир» мөөрейниң бирги сезонунда чурттуң шупту 89 регионундан, 81 чурттарда чурттап турар дөргүл-төрелдери-биле 102735 өг-бүле командаларындан 587 250 кижи киришкен. Май 27-де, ««Россия – арга-шинектер чурту» президент шөлчүгежиниң Хайгаарал чөвүлелиниң хуралында, Россияның Президентизи Владимир Путин «Бистиң өг-бүлевистиң-дир» мөөрейниң ийиги сезонунга стартты берген.
