Тыва Республикада «Россияда ажыл» кадрлар төвү дээди өөредилге черлеринге тускай сорулгалыг өөредилге олуттарынче документилер дужаары июль 25-ке чедир ам-даа уламчылап турарын дыңнаткан.
Тускай сорулгалыг өөредилге дээрге, бюджет олуттарынче аңгы мөөрей-биле киржир эптиг арганы бергени-дир. Абитуриентилер дээди өөредилге черин доозуптарга, ажылчын олутту магадылаар, өөредилге үезинде практика эртер аргалыы, чамдык таварылгаларда чагыкчы компания стипендияны төлеп база бээр.
Ажыл берикчилеринден ажылдар саналдаан база абитуриентилерден чагыглар киирген «Россияда ажыл» шөлдүң дыңнатканы-биле алырга, республикада кадык камгалал, көдээ ажыл-агый, экономика, эрге-хоойлу, тудуг болгаш өөредилге дээн ышкаш адырларда тускай мергежилдиглерге хереглел улуг. Дээди өөредилге программалары-биле 430 олутка тускай сорулгалыг өөредип бээр дугайында ажыл берикчилеринден 221 санал киргенин Тываның абитуриентилерге дыңнаткан.
ТР-ниң өөредилге, кадык камгалал, экономиктиг хөгжүлде болгаш үлетпүр, арга-арыг болгаш бойдус ажыглалының, көдээ ажыл-агый, чурагайлыг хөгжүлде, саң-хөө, тудуг яамылары, а ол ышкаш аңгы-аңгы албан черлери, ооң иштинде «Азас» күрүнениң бойдус камгалалдыг чери, Суд департаментизиниң эргелели, Росхереглелхайгааралдың Тывада эргелели, «Росчетки Сибирь Тываэнерго» АН, «Суугу» КХН, Ветеринария албаны, Таңды кожуун чагыргазы болгаш өскелер-даа черлер чагыгларны киирген.
Тускай сорулгалыг олуттарже документилер дужаарынга ам-даа бир неделя бар. Ону кылырда, РФ-тиң Эртем болгаш дээди өөредилге яамызының тайылбырлааны-биле, чуруму мындыг элээн каш базымнарны кылыр херек:
1. «Күрүне ачы-дузалары» порталынче (www.gosuslugi.ru/vuzonline) киргеш, шилип алган дээди өөредилге черинче билдириишкинни киирер.
2. Тускай сорулгалыг өөредилгени шилип алыңар: билдириишкиниңерге тускай сорулгалыг олуттарже кириксеп турарын айтыр.
3. «Россияда ажыл» шөлчүгеште (trudvsem.ru/target-edu) азы дээди өөредилге черлериниң сайтыларында чагыкчыларның саналдарын өөренип көргеш, тааржырын шилип алыңар.
4. Дээди өөредилге черлерин болгаш мөөрей бөлүктерин шилээш, тускай сорулгалыг квота езугаар мөөрейни айтыңар.
Июльдуң 25-ке чедир билдириишкинни болгаш документилерни дужаар ужурлуг, ынчалза-даа дээди өөредилге чери оон эрте хуусааны айтып болур болганда, ооң сайтызындан ону тодарадып алыңар.
Билип алыры чугула: тускай сорулгалыг квота мөөрейиниң чүгле чаңгызын шилир, ол чагыг киирикчизиниң саналынга дүгжүп турар ужурлуг.
5. Дээди өөредилге чериниң сайтызында мөөрей даңзызындан бодуңарның олудуңарны хынап туруңар.
6. Хүлээп алырынга чөпшээрел бээри: бир эвес мөөрейни эрте берген болзуңарза, август 1-ниң 12:00 шакка чедир (Москва шагы-биле) «Күрүне ачы-дузалары» порталы таварыштыр азы дээди өөредилге черинче хүлээп алырынга чөпшээрешкен дыңнадыыңарны киирерин утпаңар.
7. Хүлээп алырын манаары: «Күрүне ачы-дузалары» порталынга азы дээди өөредилге чериниң сайтызынга хүлээп алганының дугайында медээни манаңар.
8. Керээ чарары: өөредилге чылы эгелээр мурнунда чагыкчы-биле тускай сорулгалыг өөредилге керээзин чарар силер («Госключ» деп капсырылга таварыштыр азы дорт чагыкчы-биле).
Камгалал-үлетпүр комплекизиниң бүдүрүлгелеринден саналдарга тускай негелделер барынче кичээнгейни салыңар. Ооң дугайында тодаргай медээни чагыкчыдан азы дээди өөредилге чериниң хүлээп алыышкын комиссиязындан билип ап болур.
Дужаап кирериниң чурумунга азы өске-даа айтырыгларга харыыларны «Прием в ВУЗ» чаңгыс аай харылзаа-төптүң изиг шугумунуң 8-800-301-44-55, азы Россияның Өөредилге болгаш эртем яамызының 8-800-222-55-71 азы 8-800-100-20-17 телефоннарынче (онлайн дужаап кирери) долгааш, билип болур.
