Тываның алдарлыг малчыны – Вера Ундун

«Наадым-2024» малчыннар байырлалында шылгараан көдээ ишчилерге күрүне шаңналдарын Тываның Баштыңы Владислав Ховалыг тывыскан.

Чаа-Хөл кожууннуң Чаа-Хөл сумузунуӊ дузалал ажыл-агыйныӊ баштыӊы Вера Анай-ооловна Ундун «Тыва Республиканың алдарлыг малчыны» хүндүлүг атка төлептиг болган.

Малчын энениң дузалал ажыл-агыйы Бел деп черде. Көдээ ишчилер 2005 чылдан тура уруг-даары-биле демнежип, бода, чылгы малды база хаваннарны тудуп турар.

Өг-бүле ийи оол, ийи кыстыг. Уйнуктары он ашкан, олар дыштанылгаларында кезээде кырган ада-иезиниң чанында, дузалажып турарлар.

Көдээ ишчилер Даг аразы деп черде чайлаглап, күзеглеп турар. Кышты хүр ажары-биле он тонна сигенни белеткеп, ол-ла хире өдекти бөлүп алырлар. Бо чылын 20 ажыг бызааны онча-менди камгалап алганнар. Кулуннары база немежип турар. Вера Анай-ооловнаның күдээзи мал чемин белеткеп кирипкен. Сиген кезилдезиниң үезинде машина-техниканы хөлезилеп алырын көдээ ишчи дыңнатты.

Малчын эне аныяк үезинде колхоз, совхозтуң малын кадарып, 25 чыл ажылдаан.

– Ол үелерде малчын бүрүзүнге 350 төрүүр хой онаажып турган. Бир хойжу бригадка 12 кодан. Ынчан үш, беш чылдың күрүне планын күүсеткен, бедик көргүзүглерлиг малчыннарны хүндүлел бижиктер болгаш өртектиг белектер-биле шаңнап турган. Мал ажылынга 40 ажыг чылдың нүүрүн көрдүм.

Партия, райком, обком партиязының кежигүнү турдум. Улуг-Хемниң район совединиң депутадынга база соңгуттурган мен. Ол ынчан Чаа-Хөл биле Улуг-Хем чангыс кожуун турган – деп, Вера Ундун чугаалаан.

Малчын эне ТР-ниң Көдээ ажыл-агый яамызының, Дээди Хуралдың, Тываныӊ Баштыӊыныӊ Хүндүлел бижиктери-биле шаңнаткан.