Тываның аныяк башкылары «Башкы мен» программага киржип болур

«Башкы мен» регионалдыг программаның күүселдези-биле чаңгыс удаа тыпсыр компенсация төлевирин бээр дээш, 2024 чылда педагогика дээди өөредилге черлериниң доозукчуларының аразынга шилилде мөөрей эгелээнин ТР-ниң Өөредилге яамызы чарлаан.

«Башкы мен» деп регионалдыг программа школаларже аныяк башкыларны хаара тудуп, чугула херек мергежилдерде хостуг ажылчын олуттарга ажылдаар аныяк башкыларны деткиири-биле тургускан хемчеглерниң бирээзи болурун сагындыраал.

Программага кымнар киржип болурул:

- российжи дээди өөредилге черлерин 2024 чылда дооскаш, башкы мергежили-биле школада ажылдап эгелээннер;
- дээди өөредилге черлеринде улуг курстарда өөренмишаан Тываның школаларында ажылдап турар аныяк тускай мергежилдиглер.

Киржириниң негелделери:

- дээди башкы эртеминиң бары;
- документилер дужаап турар хүнде 35 хар чедир назылыы;
- неделяда эвээш дизе 18 шак школага доктаамал башкылап ажылдаар;
- кол ажылынга үш чыл дургузунда ажылдаарын хүлээнири.

Комиссия хуралынга саң-хөө деткимчезин алыр тиилекчилерни шилип алгаш, олар-биле үш талалыг дугуржулгаларны чарар.

Өөредилге яамызының демдеглээни болза, компенсация төлевириниң хемчээли планнаан акшаландырыышкынның ниити түңүнден база тиилекчилер санындан хувааттынар. Эрткен чылын 86 тускай мергежилдиг 174418 рубль хемчээлдиг компенсация төлевирин алган.
Улуг башкылаашкын неделязы-биле Тывага сентябрьда бир дугаар эрткен «Чаа салгал» аныяк башкылар шуулганында ук программа киржикчилеринге сертификаттарны байырлыы-биле тывыскан.

Тываның Баштыңы Владислав Ховалыг аныяк башкыларга байырын чедирип, чаа иштежилери сорулгаларын чедип алырынга дузалажыр кылдыр школаларда дагдыныкчыларны кижи бүрүзүнде быжыглаанын демдеглээн.

2024 чылдың киржикчилеринден билдириишкиннерни сентябрь 1-ге чедир хүлээр. Дараазында адресте Тываның өөредилге сайзырадыр болгаш мергежил бедидер институтче документилерни дужаар: Кызыл хоорай, Чургуй-оол кудумчузу, б. 1 (каб. 310). Бо телефондан 8(39422) 3-00-25 айтырыгларга харыыларны ап болур.