Тываның ажыл-агыйларында мал чеминиң белеткели уламчылавышаан

Оперативтиг штабтың хуралында хову ажылдарын база мал чеминиң белеткелин сайгарып чугаалашкан. ТР-ниң Чазак Даргазының оралакчызы Алик Монгуштуң удуртканы хуралга Көдээ ажыл-агый яамызы, ветеринария албан чери база кожууннарның көдээ ажыл-агый эргелелдери киришкен.

Эрткен чылдың бо үезинге деңнээрге, бо чылын сиген кезилдези ийи катап шалыпкын чоруп, алды муң хире гектардан алды муң ажыг тонна мал чемин белеткээн, хову ажылдарынче 17 кожууннуң 10-у киргенин көдээ ажыл-агый сайыды Юрий Оруспай илеткээн. Хожудап турар кожууннар ажыл чок кижилерни база сургуулдарны хаара туткаш ажылды дүргедедирин, кезип алган сигенни өртке удур айыыл чок чорукту сагып, шыгжап, кадагалаарын сайыт чагаан.

Муниципалдыг болгаш республика курлавырын чогуур мал чеми-биле четчелээрин Алик Монгуш кожуун чагырга даргаларынга сагындырган. Көдээ ажыл-агый эргелелдериниң тускай мергежилдиглери мал чеми белеткээр планын Көдээ ажыл-агый яамызы-биле дүүштүрер. Чижээ, Бай-Тайга кожуун - 40, Өвүр – 105, Кызыл биле Бии-Хем кожууннар 100-100 тоннаны белетээрин хүлээнген.

Оперштаб хуралының төнчүзүнде, муниципалдыг курлавыр сигенин санаваска, 10 муң ажыг дүрүг сиген белеткээр даалганы Көдээ ажыл-агый яамызында берген. Суурларда сигенчилер бригадаларының даңзызын тургузуп, бир гектарда ажылдың төлевирин чурттакчы чонга дүрген дыңнадыр даалганы база онааган.