Бо чылын Тываның ажыл берикчилеринге чорудар шинчилелдер түңнелдери-биле 2026 чылдан 2032 чылга чедир регионнуң экономиказында кадрлар хереглелин баш бурунгаар санап үндүрер. ТР-ниң Күш-ажыл болгаш социал политика яамызының дыңнатканы-биле алырга, шинчилелди «Россияда ажыл» шөлчүгешке чорудар. Аңаа өнчүнүң аңгы-аңгы хевирлеринде ажыл берикчилери болур 1300 ажыг организация киржир.
«Шинчилелдерниң түңнелдери кадрларга хереглелди баш бурунгаар санап үндүреринге болгаш Тывадан абитуриентерни тускай сорулгалыг өөредилгеже чорудары дээн ышкаш, өске-даа шиитпир хүлээп алырынга ажыглаар» – деп, Күш-ажыл яамызы тайылбырлаан.
Компания элээн каш чадаларга эртер. Февраль 1-ден 28-ке чедир шинчилелге киржир ажыл берикчилеринге өөредилгени планнаан.
Марттың 1-ден апрель 30-ге чедир шинчилелдиң бодун чорудар. А майның 1-ден июль 31-ге чедир сан-чурагайларны хынаар болза, август төнчүзүнге чедир ооң баш бурунгаар түңнелдерин үндүрер. Регионалдыг баш бурунгаар санаашкыннарны сентябрь 1-ден 30-ге чедир чоруткаш, экспертизаның түңнелдеринге даянып, октябрь 1-ден 30-ге эдилгелерни кылыр. А октябрьның 30-де регионалдыг прогнозтуң түңнелдерин таныштырар.
Ооң мурнунда Тываның экономиктиг адырларынга кадрлар хереглелин баш бурунгаар санаар 2025 чылдың апрель 1-ден июнь 15-ке чедир эрткен шинчилелдерже 902 организацияны хаара тутканын демдеглезе чогуур. Аңаа күрүне болгаш муниципалдыг 415 база күрүнениң эвес 487 организациялар киришкен. Шинчилелдерниң 2025 чылдың ноябрьда үндүрген түңнелдеринден алырга, 2032 чылга чедир Тываның экономиказының шупту адырларында кадрларга хереглел 32922 тускай мергежилдиг болган.
Ылаңгыя, өөредилгеге – 7347, кадык камгалал болгаш социал ачы-дузаларга – 5882, транспорт болгаш шыгжамыр адырынга – 4093, күрүне эргелеп-башкарылгазы болгаш шериг камгалалы, социал хандырылгага – 3115, мөөң болгаш үүрмек садыг-саарылга болгаш септелгеге – 2592, тудугга – 1197, культура, спорт, дыштанылга болгаш хөглээшкин организациязынга – 1036, ажыктыг казымалдар тывыжынга – 990, болбаазырадылга бүдүрүлгезинге – 731 тускай мергежилдиг херек. Ол ышкаш эртем-техниктиг ажыл-чорудулгага – 726, аалчылар бажыңнары болгаш чемненилге черлеринге – 711, көдээ ажыл-агый болгаш арга-арыг ажыл-агыйынга, аңныыр, балыктаашкын болгаш балык ажыл-агыйынга – 695, чырык, газ болгаш бус хандырылгазы, агаар кондиционеринге – 600, информатизация болгаш харылзаага – 479, административтиг ажылга – 408, чер болгаш өнчү-хөреңги талазы-биле – 370, суг хандырылгазы, арыг-силиг, боктар чыыр болгаш ону чок кылырынга –235, саң-хөө болгаш камгалакчыларга – 127 ажылдакчы херек.
ТР-ниң Күш-ажыл яамызының дыңнатканы-биле алырга, «Россияда ажыл» шөлчүгешке хууда кабинеттерде айтырыг-харыыны чорударын тайылбырлаан. Адырларны чогуур специалистер-биле хандырарынга идигни бээр шинчилелге ажыл берикчилери идепкейлиг киржирин сагындырган.
