Национал школа хөгжүдер институт бир неделя үргүлчүлээн “Чылдың башкызы-2025” мөөрейниң иштинче кирип турар "Тыва дыл болгаш чогаалдың тергиин башкызы” база “Школа назыны четпээн уругларның төрээн дылын сайзырадырынга шылгараан практик башкы” деп номинацияларны организастап эрттиргенин институт дыңнаткан.
Баштайгызынга 16, ийигизинге 13 башкы арга-дуржулгазын көргүзүп, уругларга кичээлдерни эрттиргеннер. Башкы кижиниң ажыл-ижи чымыштыг дээрзин база катап бадыткап, башкылар барык бир неделя дургузунда шииткекчилер мурнунга кичээлдер, мастер-класстар эрттирип, чогаадыг-эссе бижип, билдилиг ажылдааннар.
Мөөрей эгелээр мурнунда-ла белеткенип, кожуун, хоорай чергелиг чадазынга тиилеп, республикага төлептиг киржип келген.
Киржикчи бүрүзүнүң ажылын үнелеп, демдеглевишаан, жюри кежигүннери түңнелдерни үндүрген.
“Тергиин дээн төрээн дыл, чогаал башкызы” деп номинацияга 1-ги чер – Сай-Суу Уйнуколова, Балгазын школазының тыва дыл, чогаал башкызы; 2-ги чер – Чечек Хомушку, Тоора-Хем школазының эге класстар башкызы; 3-кү чер – Шончалай Монгуш, Чадаана хоорайның 4 дугаар школазының эге класстар башкызы алганнар.
“Тергиин кичээл” – Анай-Хаак Тюлюш, Кызылдың 17 дугаар школазының эге класстар башкызы база “Эге класстарның тергиин башкызы” – Олча Минчей, Самагалтайның 1 дугаар школазының эге класстар башкызы олар шылгарааннар. Үстүнде адаттынган ийи башкы тус-тузунда тускай шаңналдарга төлептиг болганнар.
"Школа назыны четпээн уругларның төрээн дылын сайзырадырынга шылгараан практик башкылар" деп номинацияга 1-ги чер – Сайсуу Хертек, Чөөн-Хемчиктиң "Малышок" уруглар садының кижизидикчи башкызы; 2-ги чер – Олча Коданмай, Самагалтайның “Челээш” уруглар садының кижизидикчи башкызы; 3-кү чер – Чодураа Хомушку, Кызыл-Мажалыктың “Аяс” уруглар садының кижизидикчи башкызы шылгарап үнгеннер.
Үстүнде ийи номинацияның тиилекчилери Тываны төлээлеп, Бүгү Россия чергелиг мөөрейге киржир эргени чаалап алганнар.
