Тываның Баштыңы башкы мергежилинде өөренип турар студентилерни стипендиялар-биле деткиир

Тываның Өөредилге яамызы республика Баштыңының даалгазы-биле эрткен чылын эгелээн «Мээң башкым» төлевилелиниң 2022-2023 өөредилге чылында түңнелдерин үндүрүп, дээди болгаш ортумак тускай өөредилге черлеринде башкы мергежилдериниң студентилеринге мөөрейниң түңнелин үндүрүп, стипендияларны тывысканын яамы дыңнаткан.

Аныяктар аразынга башкылаашкын ажылының алдар-адын бедидер дээш, Владислав Ховалыгның эгелээшкини-биле башкы ажылдакчыларын деткээн хемчеглерниң бирээзинге студентилерге стипендияларны тыпсыры болур.

Мөөрей шилилдезиниң түңнели-биле, дээди өөредилге черлериниң 10 студентизинге, ортумак өөредилге черлериниң чеди сургуулунга стипендияларны тывыскан. Стипендияларның хемчээли – дээди өөредилге черлериниң студентилеринге 5000 рубль, а ортумак өөредилге черлериниң сургуулдарынга 3000 рубль болур. Эвээш дизе 150 муң рубль түңнүг чаңгыс катап алыр деткимчелиг “Мен – башкы мен” төлевилел келир үениң башкыларын сонуургалын болдурган.

А. И. Герцен аттыг Россияның күрүнениң педагогика университеди, Н.Ф. Катанов аттыг Хакасияның күрүне университеди, В.П. Астафьев аттыг Красноярскиниң күрүнениң педагогика университеди, В. К. Штильке аттыг Барнаулдуң күрүнениң педагогика колледжизи, Тываның күрүне университеди база Кызылдың башкы колледжизи мөөрейге киришкен.

Башкылаашкын угланыышкынында мөөрейлерниң болгаш шуулганнарның киржикчилери болгаш тиилекчилери, эртем ажылында база ачы-буян ажыл-чорудулгазында идепкейжи хамааты туружу база хөй-ниитижи ажылы-биле шылгараан, келир үениң 36 башкызының ажылдарын сайгарып көрген.

Хакасияның күрүне университединиң студентизи Чаян Хертек – стипендия алыкчыларның бирээзи. Келир үениң биология башкызы эрткен чылын “Россия – арга-шыдалдарның чурту” президент шөлүнүң “Сээң шилилгең” төлевилелге чедиишкинниг киришкеш, аңаа тиилээн. Чаян өөредилге соонда чанып келгеш, школага мергежили-биле ажылдаар планныг.