Тываның Баштыңы Владислав Ховалыг Чөөн-Хемчик кожуунга ажыл албан аайы-биле ажылдаан. Сургакчылаашкынның бир кол хемчээ тус черниң маадырлары – тускай шериг операциязының киржикчилери-биле ужуражылга болган.
Владислав Ховалыг кожууннарже ажыл-агыйжы үнүүшкүннер үезинде мындыг ужуражылгаларны эрттирери чаагай чаңчыл апарган. Дайынчылар амгы үеде болуп турар болуушкуннар дугайында бодалдарын үлежип, санал-оналдарны киирип, нарын айтырыгларны көдүрген.
Тываның Баштыңы оларның санал-оналын дыңнап, дүрген шиитпирлээр аргаларны тыпкан. Владислав Ховалыг ооң дугайында МАХ бодунуң каналынга дыңнаткан.
Чадаана хоорайга база ужуражылга болуп эрткен. Владислав Ховалыг аныяктар херектериниң сайыды, Россияның Маадыры Буян Куулар-биле аңаа киришкен. Ужуражылгага башкылар, чагырга ажылдакчылары, тудугжулар, культура ажылдакчылары келген. «Дүүн тайбың амыдырылды тургусчуп турганнар болза, бөгүнде холунда ок-чепсектиг, чурттуң сонуургалдарын камгалап турар» – деп, Владислав Ховалыг демдеглээн.
Ужуражылга үезинде өске-даа чугула айтырыгларны чугаалашкан. Чижээ, дайынчыларның идип үндүргени Чөөн-Хемчик кожуунда тускай шериг операциязының айтырыгларның талазы-биле тускай төлээже кордакчыны бадылаан. Тываның Баштыңы тускай шериг операциязының киржикчилеринге болгаш оларның өг-бүлелеринге амгы үеде күүселдеде деткимче хемчеглериниң, ол ышкаш Чадаана хоорайны чаагайжыдары болгаш чаа спорт объектилерин тудары кирген хөгжүлде планнарын чугаалаан.
«Шериг албанныгларның өг-бүлелери дээш сагыш човаашкын – бистиң хүлээлгевис-тир. Кижи бүрүзү деткимче барын көрүп, республика оларга чоргаарланып чоруурун медереп билир кылдыр, бүгү-ле чүвени кылыр бис» – деп, Владислав Ховалыг демдеглээн.
Владислав Ховалыгның Сүт-Хөл кожуунга ажыл-агыйжы сургакчылаашкын үезинде тускай шериг операциязының киржикчилери-биле база шак-ла ындыг ужуражылгага кириишкенин сагындыраал. Аңаа республиканың социал-экономиктиг хөгжүлде айтырыгларын болгаш дайынчыларны тайбың амыдыралга чаңчыктырарынга деткимче хемчеглерин чугаалашкан. «Агромотиватор» программага болгаш «социал керээ» программазынга киржилге дугайында сонуургап, бодунуң бизнезин ажыдарынга, өөренип алырынга азы хууда ажыл-агый тургузарынга акшаландырыышкын дугайында айтырыгларны салган.
Тываның Баштыңы Чадаана хоорайга республиканың муниципалдыг тургузуглар чөвүлелиниң хуралын база эрттирген. Аңаа кожууннар баштыңнары-биле өрт сезонунга база часкы хову ажылдарынга белеткелди, ол ышкаш тускай шериг операциязының киржикчилериниң өг-бүлелеринге деткимче айтырыгларын чугаалашкан. Владислав Ховалыг ол чорааш, XXXIII аът чарыжының ажыдыышкынынга база киришкен.
