«Чаңгыс демниг Россия» бүгү-российжи политиктиг партиязының даргазы Дмитрий Медведевтиң удуртканы «Чаңгыс демниг Россия» партияның Чиңгине чөвүлелиниң хуралы декабрь 12-де Москвага болуп эрткен. Тываның Баштыңы Владислав Ховалыг база «Чаңгыс демниг Россия» партияның Тывада регионалдыг салбырының секретары Владислав Ховалыг чурттуң чурттакчыларының сонуургалдарынга федералдыг болгаш регионалдыг политиканы дүүштүрүп турар кол шөл болур партияның шуулганынга киришкен.
Чиңгине чөвүлелдиң хуралының хүн чурумунга партияның Улусчу программазының күүселдези-биле холбашкан амгы үениң айтырыглары, чылдың баш бурунгаар түңнелдери, келир үениң стратегтиг сорулгалары кирген. Национал төлевилелдерни боттандырарынче, социал эгелээшкиннерже, регионнарны деткииринче онза кичээнгейни угландырган. Тускай шериг операциязының хоочуннарын деткиири – кол угланыышкыннарның бирээзи.
Партияның даргазы Дмитрий Медведев тускай шериг операциязының хоочуннарын партияже хаара тударының чугулазын демдеглээн: «Бисте амгы үеде тускай шериг операциязының 890 ажыг хоочуннары чогуур албан-дужаалдарда ажылдап турар. Бистиң маадырларывыс, тускай шериг операциязының киржикчилери, Ада-чурт камгалакчылары, ам «Чаңгыс демниг Россия» чүнү кылып турарын көрүп, ол ажылда киржип турарлар. Ынчангаш партияның кандидаттарының аразында тускай шериг операциязының киржикчилериниң саны ам-даа өзер дээрзинге бүзүрээр мен».
Улусчу программаның күүселдезиниң дугайында сайгарылга үезинде, партия кежигүннери келир чылын соңгукчуларга илеткел кылырда, программаның келир чылда хемчеглеринче федералдыг бюджеттен 174 млрд. рубль акшаландырыышкынны немээнин демдеглээн. Тываның Баштыңы ол акша-хөреңгини школаларның үндезин септелгезинче, көдээ суурлар болгаш оруктар хөгжүлдезинче, «Ада-чурт камгалакчылары» фондуга дуза чедиреринге, аар аарыгларны эмнээринге деткимче кылдыр бээринче тускайлаарын тодаргайлаан.
Владислав Ховалыг бодунуң телеграм-каналынга дыңнатканы-биле алырга, хурал үезинде партия кежигүннери ачы-дуза ажылче, эки турачы чорукче, партияны «чер кырынга» быжыглаарынче кичээнгейни угландырганын дыңнаткан.
«Чаңгыс демниг Россия» 2026 чылды Тус чер салбырларының чылы кылдыр чарлааны чугула шиитпир болган. Ол дээрге муниципалдыг тургузуг бүрүзүнге, ооң иштинде мында, Тывада, тодаргай ажылдарже кичээнгейни угландырар дээни ол. Чурттуң болгаш бистиң республикаларывыстың бурунгаар хөгжүлдези чүгле чаңгыс бодалдыг кижилерниң командазы-биле болур, а партияның талалакчыларның санының өзүп турары – аңаа дорт бадыткал-дыр» – деп, Тываның Баштыңы «Чаңгыс демниг Россия» Чиңгине чөвүлелинге киришкениниң соонда бижээн.
