Тываның Баштыңы Владислав Ховалыг чазакка Дээди Хуралдың (парламент) депутаттары-биле ужурашкаш, регионну хөгжүдериниң нарын айтырыгларының талазы-биле кады ажылдаарын чугаалашкан.
Владислав Ховалыг Чазак командазының ажыл-чорудулгазын, кол сорулгаларын база регионнуң социал-экономиктиг хөгжүлдезинче угланган планнарын болгаш төлевилелдерин таныштырган.
Тываның Баштыңы нарын айтырыгларны сайгарып тура, ол талазы-биле ажылдар чоруп турарын база комплекстиг арга-хевирлер негеттинерин демдеглээн. Регионнуң турум хөгжүлдезин хандырар болгаш хамаатыларның амыдырал-чуртталгазының шынарын бедидер дээш тургустунуп келген айтырыгларны шиитпирлээринче онза кичээнгейни угландырар херек ол онзалап демдеглээн.
2026 чылда Тывага болуп эртер IV делегей чергелиг буддийжи шуулганны организастаары болгаш эрттирери ужуражылганың бир айтырыы болган. Республиканың баштыңы сентябрь төнчүзүнде Калмыкияга киришкени, III делегей чергелиг буддийжи шуулганның белеткенгениниң база ону эрттиргениниң дугайында көрген чүүлдери-биле үлешкен.
«Калмыкияга III делегей чергелиг буддийжи шуулганның бедик деңнелге организастаанының дугайында бодумнуң бодалдарым-биле үлештим. Ол хемчег бистиң акы-дуңмалышкы республикавыстың чурттакчыларын каттыштырып, Калмыкияның чаражын болгаш чонунуң өндүр бедиин аалчыларынга көргүскен. Келир чылын болур шак мындыг улуг хемчээлдиг хемчегге шыңгыы белеткел бисти манап турар» – деп, Владислав Ховалыг чугаалаан.
Россияның Президентизи Владимир Путин база Буддизм өөредилгезин болгаш шинчилелдерин деткиир фонд шуулганны 2026 чылда Тывага эрттирер дээн эгелээшкинни деткээн. Үжен хире даштыкы чурттардан киржикчилер хемчегге киржир ужурлуг.
Депутаттар Тываның чурттакчыларының чаагай чоруу дээш идепкейлиг кады ажылдаарынга, мурнунда сорулгаларны шиитпирлээринче хамаатыларны хаара тударынга беленин илереткеннер. Бо чүүл, ылаңгыя республиканың хөгжүлдезинге чугула херек оларның үзел-бодалын болгаш санал-оналдарын кичээнгейге алыр арганы бээр.
«Кады күжениишкиннер-биле регионнуң турум өзүлдезин, хамаатыларның амыдырал-чуртталгазының шынарын бедидип, кыска болгаш узун хуусаада чугула төлевилелдерни боттандырарын хандырар бис» – деп, Ховалыг бодунуң блогунда демдеглээн.
