Тываның Баштыңы Владислав Ховалыг ажыл-агый аайы-биле Луганск Улус Республикага чорааш, тускай шериг операциязының үезинде дайынчы даалгалар күүседип турар Тывадан шериг албан-хүлээлгелиглер-биле ужурашкан.
«Бүгү чүүлдү тиилелге дээш!» бүгү-российжи төлевилел күүселдези-биле «Улусчу фронт» хөй-ниити шимчээшкининиң деткип чыгганы ээлчеглиг ачы-дуза чүъгүн чедиргеш, мурнуку шугумда дайынчыларга дамчыткан.
Свердловск хоорайга автомашиналарны, даг мотоциклдерин, квадроциклди база өске-даа тускай техниканы болгаш эки турачыларның кылган камгаланып шыптынар четкилерин чедире берген. Тыва оолдарның албан-хүлээлге эрттирип турар шериг кезектеринче техника база тускай дериг-херекселдер аймаан улаштыр дамчыдар. –
– Ээлчеглиг чүъктү чыып белеткээринге киришкен шупту улуска четтиргеним илереттим. Республиканың чонундан база бистиң дайынчыларывыстан четтиргенивисти дамчыдып тур мен. Бо бүгү Тиилелгени чоокшуладырынга дузалаар! – деп, Владислав Ховалыг социал четкилерде бижээн.
Регионнуң удуртукчузу дайынчылар-биле ужурашкаш, оларны кичээнгейлиг дыңнап, дилеглерин демдеглеп алган. Оолдарның хөй кезииниң дилээ – фронтуда тулчуп турар солдаттарның өг-бүлелеринге чогуур бүгү деткимчени көргүзерин аазаан.
