Регионалдыг диспетчер албанының дыңнатканы болза, май 7-де эртенгиниң 8 шакка чедир, Тывада чеди арга-арыг өрттери хып турган, оларның ниити шөлү 2959 гектар.
Чадаананың, Туранның, Шагаан-Арыгның, Каа-Хемниң, Таңдының, Барыын-Хемчиктиң арга-арыг черлеринде тайгалар өрттенип турар. Эң улуг өрттер Чадаананың арга-арыг ажыл-агыйының Сүт-Хөл (өрттүң шөлү 1000 гектар ашкан), Бүрен-Бай-Хаак (610 гектар), Туран (599 гектар), Бай-Хаак (182 гектар) арга-арыг участоктарында болуп турар.
Тываның Баштыңы Владислав Ховалыг чурттакчылыг черлерже эң-не чоок өрт хып турар Таңды кожуунга дүүн четкен. Кижилерниң хайы-биле өрттер үнгени баш бурунгаар билдинген. Владислав Ховалыг оперативтиг штабка четкен. Чурттакчылыг черлерже – Бай-Хаак, Дүрген, Сосновка суурларже чоокшулаан өрт айыылын чайлаткан. 246 кижи болгаш он-он техника ында ажылдап турар. Күштүг хат болгаш чедери берге черлер өрт өжүрер ажылды бергедедип турар. Онза байдалдар яамызы база регионалдыг авиаарга-арыг камгалал албаны-биле кады Хакасиядан эки турачы дружиналар, тус черниң чурттакчылары, өртчүлер ажылдап турар. Изиг аъш-чем болгаш суг-биле хандырттынган.
Чүгле эрткен хүннүң дургузунда Чербиниң арга-арыг ажыл-агыйының участогунда ниитизи-биле 30 гектар черге хып турган өрт өжүртүнген.
Тываның Арга-арыг яамызының курлавырында 105 кижи болгаш 74 техника бар. Регионнуң девискээринде арга-арыг өрттерин өжүржүр дээш «Авиаарга-арыг камгалалының» Красноярск биле Абаканның авиация салбырларның чүс ажыг ажылдакчызы келген.
2026 чылдың өрт сезону эгелээнден бээр Тывада ниитизи-биле 3978,24 гектар шөлдүг 36 арга-арыг өрттү бүрүткеттинген. Оларның 34-ү арга-арыг фондузунуң черлеринге база ийизи федералдыг ужур-дузалыг онза камгалалдыг бойдус девискээрлеринге (Убса-Нур ыйгылаажы) болган.
Тываның Баштыңы социал четкилерде бодунуң арыннарында чаңгыс чер чурттугларынга кыйгырыгны кылган.
«Кижи бүрүзүнден өртке удур айыыл чок чоруктуң дүрүмнерин шыңгыы сагыырын, бойдусту болгаш бажыңнарын камнаарын дилээр-дир мен. Бичии-даа серемчилел чок чорук улуг каражага чедирип болур» – деп, Владислав Ховалыг сагындырган.
Тываның девискээринде май 4-тен эгелеп, арга-арыгларга регионалдыг онза байдал чурумун киирген. Чарлаттынган онза чурум хамаатыларның болгаш транспорт аймааның арга-арыгже кирерин шуут хораан. Ол ышкаш апрель 15-те республикада чарлаан өртке удур онза чурумну май 26-га чедир узаткан.
