Бөгүн Иштики херектер органнарының хоочуннарының бүгү-российжи хөй-ниити организациязының тургустунганындан бээр 35 чыл оюнга тураскааткан байырлыг хурал болуп эрткен.
Тываның Баштыңы Владислав Ховалыг хоочуннарга байыр чедирип, Иштики херектер органнарының эвээш эвес хоочуннары эки турачылар кылдыр тускай шериг операциязынга киржип, эрес-дидим маадырлыг чоруун көргүзүп турарын онзалап демдеглээн.
“Тываның Иштики херектер яамызының хоочуннар организациязы идепкейлиг ажылдап турар. Хоочуннар хүлээлгезинге болгаш даңгыраанга шынчы болуп, бөгүн база амыдыралдың идепкейлиг туружун ээлеп, шилип алган ажыл-херээнге ак сеткилдиг хамаарылганың үлегер-чижээ болуп, аныяк ажылдакчыларга мөзү-шынар айтыкчызы болуп чоруур.
Бөгүн хоочуннар болгаш амгы ажылдакчылар корум-чурум камгалаар органнарның чалыы дузалакчыларында боттарының идегелин көрүп турар. Силер бистиң республиканың болгаш Бүгү Россияның чурттакчыларының корум-чурум камгалалынга, айыыл чок чоруунга бодуңарның төлептиг үлүг-хууңарны киирериңерге бүзүрээр мен” – деп, Владислав Ховалыг чугаалааш, күрүне шаңналдарын тывыскан.
Ол ышкаш «Эрге-хоойлу камгалаар органнарның чалыы дузалакчызы» төлевилелдиң киржикчилеринге өөрүп четтириишкин бижиктерин тывыскан.
Тываның Баштыңының Хүндүлел бижиинге ТР-ниң Иштики херектер яамызының Чаа-Хөлде хоочуннар организациязының кежигүнү милицияның майору Тамара Сотнам төлептиг болган. Хоочуннуң оглу тускай шериг операциязында эрес-дидими-биле төрээн чуртун камгалап эгелээнинден бээр үш чыл четкен. Тамара Сотнам ийи чыл бурунгаар хууда “Нива” маркалыг автомашинаны дайынчы хөделиишкиннер девискээринче чорудуп, акша-төгерик дузаламчызын шаа-биле доктаамал чорудуп турар.
П.А. Морозов аттыг аграрлыг лицейниң адыгы классчызы Эрес Сарыглар Тываның шериг комиссариадынга, Кутузов орденниг гвардейжи 55-ки мото-адыгжы (даг) бригадага, Каайлы черинге дээш оон-даа өске эрге-хоойлу черлерге чедип, аңгы-аңгы хемчеглерге киржип турарын чугаалаан.
«Эрге-хоойлу камгалаар органнарның чалыы дузалакчызы» төлевилел бо чылдың февраль айда эгелээн. Ында албан-хүлээлгезин күүседип тургаш, амы-тынындан чарылган иштики херектер болгаш эрге-хоойлу органнарының ажылдакчыларының, тускай шериг операциязының киржикчилериниң, ада-иезиниң хайгааралы чок арткан 10 хардан 15 харга чедир уруглар киржип турар.
ТР-ниң иштики херектер сайыды Юрий Завьялов, Россияның Маадыры Буян Куулар, ТР-ниң Дээди Хуралының даргазы Каң-оол Даваа, Тываның Иштики херектер яамызының хоочуннар организациязының даргазы Валерий Тарыма болгаш өске-даа эрге-хоойлу органнарының удуртукчулары хоочуннарга байыр чедирген.
Чуруктарны Александр Ензак тырттырган
