Тываның Баштыңы [id360104045|Владислав Ховалыг] республиканың спорт сайыды Владимир Түлүш баштаан, Кыргызстанга эртер көшкүн чоннарның VI бүгү делегей оюннарынга киржир Россияның командазынче кирген бөлүктүң кежигүннери-биле ужурашкан.
Чүс ажыг чурттардан киржикчилерни хаара туткан ол хемчегде, көшкүн чоннарның үндезин спортчу хевирлерге күжүн шенежирлер. Владислав Ховалыг элээн улуг чарыгдалдар херек делегацияны деткиир деп шиитпирлээн.
Спорт сайыды Владимир Тулуш Тываның Баштыңынга спортчу маргылдааларга киржириниң планнарын дыңнаткан. Россияның чыынды командазында Тываны мөгелер Айдың Монгуш, Юрий Кызыл-оол, Мөңге-Эртине Куулар төлээлеп, хостуг хүрешке, сумога, моол национал хүрешке хүрежир. Ол ышкаш аът чарыштарынга 12 мал киржир, оларны ээлери болгаш мунукчулары эдертип чедер. Ынчап кээрге, чүгле спортчу хемчеглерге 30 ажыг кижи киржир. Оон аңгыда, хемчегниң программазын өөренип көргеш, культура болгаш эртем төлээлери база киржир планныг. Бөлүктүң киржикчилерин аай-дедир узун орук манап турар, ол ышкаш малдарны сөөртүрү база нарын.
Владислав Ховалыг ужуражылганың түңнелинде, Тывадан российжи команданың кежигүннерин деткииринге беленин илереткен. Тываның Баштыңы маргылдааларның киржикчилеринге чедиишкиннерни күзеп, тыва спортчулар болгаш культура ажылдакчылары делегей чергелиг деңнелге Тываны төлептиг көргүзер дээрзинге бүзүрелин илереткен.
«Биске бо дээрге чүгле маргылдаалар эвес, а бистиң ышкаш көшкүн ужур-чаңчылдарны кадагалап чоруур кижилер-биле үнелеп четпес арга-дуржулга солчулгазы-дыр. База ол ышкаш Тываны бүгү делегейге таныштырар база бир арга-дыр» – деп, Владислав Ховалыг демдеглээн.
2026 чылдың август 31-ден сентябрь 6-га чедир Кыргызстанга көшкүн чоннарның VI бүгү делегей оюннарын болуп эртер. Маргылдаалар болгаш кол хемчеглер Бишкек хоорайга болгаш Ыссык-Хөл хөлдүң эриинге болур. Программада спорттуң үндезин хевирлеринге, аът спортунга хемчеглер, ча адарынга, угаан оюннарынга маргылдаалар база «Көшкүн чоннарның өртемчейи» деп этнокультурлуг фестиваль кирген.
Бөлүктүң кежигүннери август 17-де орукче үнүптер планныг.
Медиахолдинг «Тывамедиагрупп» подвёл итоги конкурса «Легенды и были святынь Тувы»
Издательский дом «Тывамедиагрупп» завершил республиканский конкурс творческих работ «Легенды и были святынь Тувы», посвящённый IV Международному буддийскому форуму.