Тываның Баштыңы Владислав Ховалыг баштаан делегация Санкт-Петербургта «Экспофорум» конгресс-делгелге төвүнде Санкт-Петербургтуң делегей чергелиг XXIX экономиктиг шуулганында киржип турар. Россия Федерациязының регионнарының коллективтиг делгелгезинге республика бодунуң экономиктиг чедиишкиннерин болгаш инвестиция төлевилелдерин таныштырары чаңчыл апарган.
«Тывага бо дээрге, боттарывысты алдаржыдып, улуг бизнести болгаш федералдыг деткимчени хаара тудуп болур чылдың кол шөлдериниң бирээзи-дир. Мурнувуста график долу. Элээн каш чугула дугуржулгаларга аттар салырынга белеткенип турар бис – шуптузу бистиң республикавыстың стратегтиг хөгжүлдезинге хамааржыр: инфратургузугну эде чаартырындан эгелээш, чаа инвестиция төлевилелдерин эгелээринге чедир» – деп, Тываның Баштыңы МАХ мессенджерде бодунуң каналынга дыңнаткан турган.
Тодаргайлаарга, Тываның чазаа биле Омск база Томск областарның чагыргалары дугуржулгаларны чарар ужурлуг. Оон аңгыда «Яндекс», «ТТ-Трэвел», «КамАЗ», «Ростелеком», «Ареал», «Сбербанк» компаниялар база «Эрмитаж» музейи-биле дугуржулга төлевилелдери белеткеттинген. Аңгы-аңгы адырларга кады ажылдажылга тургустунар ужурлуг. Чижээ, «Яндекс» регионнуң мурнакчы бүдүрүлгелеринге чурагайлыг шиитпирлерни боттандырарынга база Тываның транспорт, энергетика, социал инфратургузуун моон-даа соңгаар чургайжыдарынга киржир.
Шуулганның бирги хүнүнде-ле «Ареал» компания-биле стратегтиг дугуржулга чардынган. Кады ажылдажылга регионнуң комплекстиг хөгжүлдезинче, ооң иштинде чаа ажылчын олуттарны тургузарынче, инвестицияларны хаара тударынче, социал инфратургузугну чаартырынче угланган. Ол чүүл девискээрлер чаагайжыдылгазынче болгаш чурттакчыларны деткииринге немелде курлавырларны бээр деп, Владислав Ховалыг демдеглээн. Кызылга кадыкшылы кызыгаарлыг уругларга спорт залын тудары база «Кызыл — Эрзин — күрүне кызыгаары» автомобиль оруунуң септелгезин акшаландырары инвесторнуң планнарында кирген. Кадрлар курлавырларын хөгжүдер айтырыгны аңгы сайгарып көрген.
«Ареал» компания өөредилге черлеривис-биле кады «Профессионалитет» федералдыг төлевилел күүселдези-биле тускай мергежилдиглер белеткээр амгы үениң системазын тургузар. Келир үениң тускай мергежилдиглеринге херек эртемни чедип алыр, амгы үениң бүдүрүлгелеринге депшип ажылдаар, төрээн чериниң хөгжүлдезинге үлүг-хуузун киирер арганы ол бээр» – деп, Владислав Ховалыг демдеглээн.
Организаторларның дыңнатканы-биле алырга, Россиядан киржикчилерден аңгыда, 130 ажыг чурттарның төлээлери шуулганга киржир. Ажыл-агыйжы программада делегей болгаш россияжи экономика, перспективтиг технологиялар, ооң иштинде кылымал угаан болгаш робототехника, чаа технологиялар үезинде социал хөгжүлдеге хамаарышкан айтырыглар сайгарар 150 ажыг темалыг сессиялар кирген. Июнь 5-те шуулганның кол болуушкуну – пленарлыг хурал болур, аңаа Россияның Президентизи Владимир Путин сөстү алыр. Июнь 6-да шуулган ажылын доозар.
