Владислав Ховалыг Тываның барыын кожууннарынга ажылчын сургакчылаашкын үезинде, школалар тудуу болгаш септелгези кайы хире чоруп турарын хынап, элээн каш социал объектилерге четкен.
Хыналданың түңнелдери-биле тудугларның темпизин дүргедедир, ол ышкаш объектилерде ажылчын күштерниң чедишпезиниң айтырыын шиитпирлээр даалгаларны харыысалгалыг яамыларга болгаш муниципалдыг тургузуглар чагыргаларынга берген.
«Көдээ черлерниң комплекстиг хөгжүлдези» күрүне программазы-биле Улуг-Хем кожууннуң Чодураа суурда 176 олуттуг школа тудуун бо чылдың декабрь айда доостур. «Прогресс» КХН тудугну хүлээнген.
Владислав Ховалыг тудуг шөлүнде ажылдарны хынап көргеш, ажылды дүргедедирин тудугжулардан негээн.
– Айыттынган үезинде чүгле школаны эвес, а ооң инфратургузуун: котельная, арыглаашкын, суг чыыр черин база коммунал четки тудуун база доозар херек – деп, Тываның Баштыңы хыналда соонда айыткан.
Чадаана хоорайда 616 олуттуг тудугнуң үшкү каъдын дуглай берген болган. Ооң-биле чергелештир ханаларын тудуп үндүрүп турар. Суг дамчыдар база канализация четкизин салыр черин белеткээр ажылдар эгелээн.
“Өөредилге” национал төлевилелдиң “Школачы өөредилге системазының эде чаартылгазы” күрүне программазы-биле бо чылын республикада алды школаны үндезини-биле чаартып турар. Владислав Ховалыг үнүүшкүн үезинде Чөөн-Хемчикте Хөндергей биле Бай-Тайгада Тээли школаларын хынаан.
– Кылыр ажылдар ам-даа хөй. Уругларга болгаш башкыларга эң-не таарымчалыг байдалдарны тургузар дээш, ажылдарны шынарлыг кылыр херек – деп, Владислав Ховалыг септелгеде объектилерни эргээн соонда бижээн.
Тудуг шөлдеринде ажылдың графигин шыңгыы сагып турарын хыналдага алырын Өөредилге болгаш Тудуг яамызынга онааган.
