Тываның Баштыңы республиканың сөөлгү алды чылда хөгжүлдези болгаш чедиишкиннери-биле таныштырган

“Россия” делегей чергелиг делгелге-шуулганының хары-угда каш аңгы шөлдеринге Тыва Республиканың хүнү болуп эрткен.

Регионнуң сөөлгү алды чылда хөгжүлдези болгаш чедиишкиннери-биле Тываның Баштыңы Владислав Ховалыг таныштырган. Ажыл-херекчи девискээрге “Келир үеже инвестициялар. Тываның хөгжүлдезиниң кедилиг угланыышкыннары” деп стратегтиг сессия болуп эрткен.

Сессияның ажылынга РФ-тиң Үлетпүр болгаш садыг яамызының металлургия болгаш материалдар департаментизиниң оралакчы директору Владислав Демидов, РФ-тиң транспорт сайыдының оралакчызы Валентин Иванов, РФ-тиң Экономиктиг хөгжүлде яамызының регионалдыг политика департаментизиниң директору Дмитрий Косткин, Россияның регионнарының хөгжүлдезиниң инвестиция болгаш инновация адырында регионнар экономиказының төвүнүң удуртукчузу Марат Фаттахов, «Енисей Сибирин хөгжүдер корпорация» деп автономнуг саарылга чок организацияның чиңгине директору Сергей Ладыженко олар киришкеннер.

Туризм адырынга Тываның арга-шинээниң дугайында чугаалап берген, аңаа «Тыва инкогнито» деп чаа турисчи угну таныштырган. Маңаа-ла бо маршруттуң талазы-биле путевкаларның ойнадыышкыны болган.
Тыва Республиканың «Көшкүннерниң делегейи» деп аас чогаал ансамбльдериниң чыынды программазын көргүзүп, тыва чоннуң куда езулалдарын аңаа таныштырган.

Тываларның культуразынга хөөннежиксээн кижилерге “Алаш” ансамблиниң хөөмей-сыгыдының үделгези-биле интерактивтиг лекцияны эрттирген. Ол-ла хүн «Скиф салгал: Тываның Хааннар шынаазының алдыны» деп лекция болуп эрткен. Тываның хүнү республиканың билдингир артистериниң болгаш чогаадыкчы коллективтериниң кол кудумчу сценазынга “Енисейниң бажын алган чери” деп концерт-биле доозулган.