Тываның Чазак Даргазының оралакчылары, сайыттар база албан черлериниң удуртукчулары 2025-2030 чылдарда республиканың социал-экономиктиг хөгжүлдезининиң амы-хууда программазының ажыл-чорудулгазының күүселдези дээш хууда харыысалганы хүлээнген.
Документиде кым кандыг ажыл адырларын харыылаарын хувааган. Амдыызында хостуг Чазак Даргазының бирги оралакчызы албан-дужаал бизнести деткиири, тускай экономиктиг девискээрни тургузары, үлетпүр парктары болгаш турисчи инфратургузуг объектилери-биле холбашкан төлевилелдерни харыылаар.
ТР-ниң Чазак Даргазының оралакчызы Уран-оол Ондарга агроүлетпүр комплекизин күштелдирер төлевилелдерни дааскан. Мал азыраар комплекстер тударын, хой эъдин бүдүнү-биле болбаазырадыр долу ажылдыг бүдүрүлгени тургузарын, арга-арыг үнүштерин белеткеп база болбаазырадыр пунктулар четкизин чаартыр сорулганы чедип алыр ужурлуг.
ТР-ниң Чазак Даргазының оралакчызы Олег Лукинге чуртталга бажыңнарының тудуу база тудуг материалдарының чаа бүдүрүлгелери кирген тудуг төлевилелдерин дааскан. Ылаңгыя, бүдүрүлгениң хемчээлин улгаттырарынга болгаш калбак хана материалдарының аңгы-аңгы хевирлерин көвүдедиринге, бетон заводун ажылдадырын болгаш бетондан кылыглар бүдүрүлгезин хайгаараар.
Чазак Даргазының оралакчылары-биле чергелештир социал-экономиктиг хөгжүлдениң амы-хууда программаның күүселдези дээш харыысалгалыг командаже экономиктиг сайзырал болгаш үлетпүр, көдээ ажыл-агый болгаш аъш-чем, орук-транспорт комплекизиниң, тудуг сайыттарын, туризм агентилелиниң директорун киирген.
Программаның хемчеглерин акшаландырарынче регионалдыг инвестиция фондулары: Тываның хөгжүлде фондузу, Сайгарлыкчы чорукту деткиир фонд, арат ажыл-агый бизнезин болгаш көдээ ажыл-агый кооперативтерин хөгжүдер фондунуң директорларын хаара тудуп, харыысалганы онааган.
Тываның Баштыңы социал-экономиктиг хөгжүлдениң амы-хууда программаның күүселдезиниң дугайында ай санының илеткелдерин ТР-ниң Экономиктиг хөгжүлде болгаш үлетпүр яамызынче киирерин база “Электроннуг бюджет” информация системазынче кылган ажылдарның дугайында медээлер-биле хандырылганы адаттынган удуртукчуларга хүлээндирген. Оларның хууда харыысалгазы программаның пункт бүрүзүн долузу-биле боттандырарының немелде магадылалы болур деп, Владислав Ховалыг санап турар.
Тываның саналдааны-биле, федералдыг чазак 2020 чылда экономиканың куду деңнелдиг регионнарының дүрген хөгжүлдезин хандырар социал-экономиктиг хөгжүлдениң амы-хууда программаларны ажылдадып эгелээнин сагындыраал.
2020 чылдан 2024 чылга чедир Тыва, Адыгея, Карелия, Чувашия, Калмыкия, Алтай Республикалар, Марий Эл, Алтай крайлар, Псков база Курган областар ындыг программаларны боттандырган. Олар элээн сайзыралды ап, экономиканы быжыглап, ажылчын олуттарны тургускан.
