Тываның Баштыңы Владислав Ховалыг чогаадыкчы өг-бүле – режиссер, продюсер, сценарист база артист Владимир Копуш база ооң өөнүң ишти балетмейстер Татьяна Баян-биле ужурашкан.
Регионга кинематографияны хөгжүдериниң келир үези – чугааның кол утказы болган. Тывада кадрлар курлавыры, тодаргайлаарга, республикага профессионал кино тырттырарын хөгжүдеринге шимчедикчи күш апаар салым-чаяанныг аныяктар бар дээрзин Владимир Копуш бүзүреткен. Режиссер Тываны делегейге алдаржыдып болур бедик шынарлыг, регионалдыг киноларны тырттырар күзелин Владислав Ховалыг-биле үлешкен.
«Кино дамчыштыр Тываның бойдус чурумалының чаражын, тыва чоннуң байлак культуразын, чаңчылдарын бүгү делегейге көргүзүп болур бис дээн ооң бодалын деткиир-дир мен» – деп, Владислав Ховалыг режиссер-биле ужурашканының дугайында медээни бодунуң социал четкилерде блогунда үлешкен.
Владимир Копуш бодунуң «Кайгал» деп чаа төлевилелиниң база тыва классик, Тываның Улустуң чогаалчызы Кызыл-Эник Кудажының сураглыг «Уйгу чок Улуг-Хем» деп чогаалынга үндезилеттинген сериалды тырттырар дугайында планнарын регионнуң удуртукчузунга чугаалаан. Олар Тывага кино тырттырылгазын организастаарынга деткимче көргүзериниң хемчеглерин чугаалажып, чогаадыкчы бөлүктер, продакшн компаниялар, регионалдыг эрге-чагыргалар-биле кады ажылдаарының чугулазын онзалап демдеглээннер.
«Владимир Намдымоловичиге тыва культураның байлаан, регионнуң бойдус чаражын делегейге ажыдар дээн чаа ажылдарынга чогаадыкчы чедиишкиннерни болгаш хей-аътты күзедим» – деп, Владислав Ховалыг демдеглээн.
